Россиялъул гражданал – пенсионеразе 5 азарго гъурущалъул роцада цинц1ул кьолеб компенсация щвезе бугилан абураб хабаралъе баян кьолеб буго районалъул пенсионнияб фондалъул управлениялъул нухмалъулей Ах1мадова Пат1иматица.

- Щай компенсация г1иц1го 2017 соналъул январь моц1алъ щвезе бугеб?

- Гьабсаг1аталда улкаялъул экономика ц1акъго х1алуцараб ах1вал-х1алалда, сундулъго ц1уна-къай гьабизе кколеб х1алалъ буго. Х1исабалде босулеб буго федералияб бюджеталдаса гьелъие ресал ратизе. РФялъул х1укуматалъ гьелъие х1аракат бахъулебги буго. Баяназда рекъон гьелъие х1ажалъулеб буго 200 миллиардалдасаги гъурущ.

- Щай компенсация цинц1ул кьолеблъун гьабураб?

Экономикаялда лъугьараб лъик1аб гьеч1еб ах1вал-х1алалда бан  улкаялда 2016  соналъ хисизабун буго санайил пенсиязул индексация гьабулеб бук1араб къаг1ида.

Исана т1оцебесеб февралалдаса  х1алт1уларел пенсионеразул индексация гьабуна 4 проценталъ ва т1оцебесеб апрелалдаса 4 проценталъ индексация гьабуна пачалихъияб хьезериялда рекъон кьолел пенсиязул. Гьелда хурхун х1укму  гьабун буго 2017 соналъ ц1ияб индексация гьабилалде 2015 соналъул инфляциялда ва 2016 соналъул т1оцебесеб февралалда гьабураб индексациялда гьоркьоб ккараб ками 2016 соналъул хут1арал моц1аз циндаго кьун лъуг1изабизе. Циндаго кьолеб  гьеб г1арцул къадар – 5000 гъурущ г1ага-шагарго бащалъулеб буго  к1иабизе гьабураб индексациялъул х1асилалда  пенсионерасе гьоркьохъеб х1исабалда щвезе бегьулеб бук1араб г1арцуда. Цадахъго щолеб бук1иналда бан циндаго компенсация кьей пенсионерасе пайдаябги буго.

Цадахъго кьолеб г1арац щвезе буго страхалъулаб ва пачалихъияб хьезариялъул пенсия щолев 43 миллионалде г1агарун чиясе, гьев х1алт1улев ватаниги ватич1ониги.

- 2016 соналъул февралалда индексация гьабуна г1иц1го х1алт1уларел пенсионеразул пенсиязул. Кьезе бугищ циндаго щолеб компенсация х1алт1уда ругел пенсионеразе?

Ц1акъго багьаби рорхиялъул х1асилалда бет1ербахъиялъул зах1малъабаз гъорлъе рачана киназего г1агарун пенсионерал. Гьел шарт1азда рекъон РФялъул х1укуматалъ х1укму гьабун буго циндаго кьолеб  компенсация х1алт1уда ругелги гъорлъе рачун, пенсионеразул киналго категориязе кьезе.

- Кинаб къаг1идаялъ г1умруялде бахъинабизе бугеб циндаго щолеб компенсация кьеялда хурхун гьабураб х1укму?

Ихтияразул рахъалъ босани, циндаго кьолеб компенсация гьеб ккола улкаялъул гражданазе социалияб кумек х1исабалда РФялъ  гьабураб т1аде боси. Гьединлъидал, жиндир разилъи бугони рекъон кколеб федералияб законги къабул гьабун, циндаго щолеб компенсация кьеялъул х1укму г1умруялде бахъинаби РФялъул Конституциялъул нормабазда рекъон  законал рахъулеб органалде т1аде ккола.  Бицен гьабулеб законалда рихьизарун рук1ине ккола компенсация щолел г1адамазул, кьезе бугеб г1арцул къадар ва гьеб г1умруялде бахъинабиялъе х1ажалъулел киналго шарт1ал. Гьединаб федералияб закон Пачалихъияб  Думаялде босизе х1адур гьабизе т1адкъан буго Рфялъул Х1укуматалда.

- 2017 соналъ кинаб къаг1идаялъ гьабизе бугеб пенсиязул индексация?

Улкаялъул экономикияб ах1вал-х1алалъухъ балагьун санайил пенсиязул индексация гьабиялъул къаг1ида г1иц1го 2016 соналъ гурого хисизабич1о. 2017  соналъ х1исабалде босун буго страхалъулал пенсиязул араб соналъул инфляциялда рекъон ва пачалихъияб хьезариялъул пенсиязул ПМП ц1ик1к1иналда рекъон индексация гьаби т1убанго базовияб федералияб пенсиязул законодательствалда рекъон ккезабизе.  Страхалъулал пенсиял ц1ик1к1ине руго араб  соналъ  потребителазул багьаби  рорхиялъул  индексациялда рекъон. Социалиял пенсиялги гъорлъе рачун пачалихъияб хьезариялъул пенсиязул индексация гьабизе буго т1оцебесеб апрелалдасан араб соналъ пенсионерасе г1умру гьабизе х1ажалъулеб бищунго г1одобег1анасеб къадаралъул индексги х1исабалде босун.

- 2017 соналъ пенсия бахъиялъул ва индексация гьабиялъул базаялде гъорлъе кколищ гьеб компенсация?

- Х1укму гьабун буго 2016 соналъул индексация цинц1ул кьолеб компенсациялъун гьабизе. Гьеб ккола г1иц1го социалияб кумек х1исабалда кьолеб г1арац ва пенсияздалъун хьезариялде гъорлъе унаро. Х1исабалде босун буго Федералияб закон къабул гьабун хадуса РФялъул пенсионнияб фондалъ гьеб компенсация 2017 соналъул январалъул пенсиялда цадахъ кьезе.