«ПАТРИОТ»-ин абураб раг1и жив гьавураб, гIураб, гIумру гьабун вугеб ВатIан кутакалда бокьулев, гьелъие гIоло гIумру кьезеги хIадурав чи вугин хъван буго словаразда. Гьеб тайпаялъул чагIи рахъинаризе кколел 40 чи вуго дир хъизаналъул (лъималги, гьезулги лъималги). Гьезул микьгоял дица хьихьун руго. Гьезул эмен, нус-нус азар чи ч1вараб рагъги жив сабаблъун ккарав, миллионал г1адамал жидер ват1анги тун къват1исел пачалихъалде лъутизе ккарав, жакъаги жаниса рагъги къойидаса къойиде ц1ик1к1унеб бугеб Сириялъул президент Б.Асад лъик1ав чи гьеч1ин абун бугин гьесилан, т1ад уголовнияб делоги рагьун къват1ив ч1езавун вуго. БитIараб батила, жиндир ВатIан бокьизе ккела, амма, гьелъие гIоло гIумру кьолеб хIалалъ гьел чагIи куцазе, гьезие тарбия кьезе ккани, захIмалъизехъин буго гьаб заманаялъ бугеб хIалалъухъ балагьун. Доздаги бихьулеб бугелъулха телевизоралдасанги интернеталдасанги ВатIаналдаги дунялалдаги лъугьунеб бугебщинаб.

Масала, школалде хьвадулел гьитIичазда дица бичIчIизабизе кколеб буго, 40 соналъ хIукуматалъе кепказухъги хIалтIун, гьанже пенсиялде индал дие щолин 10 азарго гIечIеб гъурущ. Гьелдаса дица, рукъалъул гIатIилъи 125 квадратияб метр бугелъул, рукъ хинлъизабунги, квен гьабунги, бухIараб лъим чIезабунги, газалъухъ кьезе кколин гьеб кинабго гIарацилан. 125м.кв х15м.куб+300м.куб=2175куб.м х4-72 руб= 10266 руб. ( 125- рукъалъул гIатIилъи, -15 куб.м. цо квадрат рукъалъул хинлъизабизе моцIие къваригIунеб къадар,300куб.м -цо чиясе квен гьабизеги бухIараб лъим чIезабизеги хIажалъулеб къадар. 4,72 гъур. - цо куб.м.газалъул багьа). Нуж анцIазего хIукуматалъги кьолин щивасе 114 гъур.кинабго 1140 гъур. Гьебги тIад лъуни токалъулги газалъулги налъи хIалицаго бецIулин.

Нилъер дахIабабаеги бачIунин гьебго 10 азарго гъурущ гIанасеб пенсия. Гьеб гIезабизе кколинха нилъеца моцIалъ киназего кваназеги, ретIизеги, секциялде хьвадулезе тренерасе кьезеги, лъималазул ахикье унезе гьенибе кьезеги. Накалдаса багьарасе тIажу босизеги, дунял квачан бугелъул, хинаб ретIел босизеги нилъер гIарац гьечIин, кIудиясдаса бахъараб гьитIинасги ретIун рукIине ккезе ругин.

Дагьал чIахIиязда абизе кколеб буго, нужеда бихьулеб гьечIищин кинабго Евросоюзалъ нилъер пачалихъалъе санкцияги лъун, нилъергун дармил гьоркьорлъаби хвезарун рук1ин. Нилъер хIалтIулеб завод фабрикги гьечIолъи. Нилъер пачалихъ, къой 200 миллион долларги харж гьабун, ГIиракъалъулги Сириялъулги къосарал къавмазде багъулеб бугин. Украиналъул чанго областалъеги Крымгун Симфераполалъеги кумек гьабулеб, гьенирги рагъда ругин. Турказ нилъер самолётги бортизабун, гьезухъа рачIунел рукIарал учузал кванил нигIматалги ретIел-хьитги тIокIаб биччазе рагIуларин. ТIаде жоялъе гьанже , гьал рикIкIаде юк баччулел чIахIиял машинабазул шопералги ругин хIалтIуде рахъинчIого чIун, жал Платоналъул миллиардерал- Роттенбергал хьихьизе регIарал чагIи гурин, километр рикIкIун 3,73 гъурущги гьезие кьун, рокъор ругел хъизанал хьихьизе рес гьечIого ругин. Жидеда жо абулел чагIи, ПАТРИОТАЛ гурин абун рагIулин гьезул хIалтIухъабазги.

Гьезулгун нилъеца тушманлъи лъазабизе кколин, гьезул къайи тукабаздаса босизе бегьуларин абулел нилъер хIакимзабаз Европаялъул улкабазда чIухIаралдаса чIухIарал хъулби росулел ругин, гьезул лъималги гьенир цIалулин, нилъер гьаниса бикъараб гIарацги гьезул банказда цIунулин. Гьанже Турциялъулгунги дандеккунгутIи бугин, гьенир 19 абилеб гIасруялдаго гочун арал Дагъистаниязул аза-азар чиги хIебтIараб,гьезие тIубарал росаби разе бакIалги кьураб, гьел цIализарун кIуди-кIудиял хъулухъаздеги тараб пачалихъалде нужецаги тушманлъи лъазабизе кколин. Рисалат холдингалъул чагIаз гьезул байрахъцин нахъе бахъанин ГI.ГIалиевасул цIаралда бугеб спортзалалдасаян. Гьел турказ МахIачхъалаялда бараб мажгиталдеги нуж какде ине бегьуларин.

Пенсиялъул моцIие I0 азарго, хIалтIулев вугесе I0-I5 азарго гъурущги кьун «лъикI хьихьун», гIодор дипломалги лъун, хIалтIизе бакIги гьечIого ругел нужги ПАТРИОТАЛ рукIине кколин дадал тIанчIиянищха дица гьазда абилеб?

Дунни гIакълу-лъай гьечIев чийин те, нужеца бицеха, гьаб хIукуматалъ гьабсагIат гьабулеб къватIисеб сиясаталдасан нужееги диеги бугеб хайир.

Щай дие, кIудияв чиясе Крымги, Донецкги, Сирияги, Турцияги, гьенир унел миллиардалги къваригIун ругел? Щиб хайир дие гьенисан щвезе бугеб? Берцинго машина бачине бегьулел нухал гьечIеб; нилъерго гьанир сах гьарулел бакIал гьечIолъиялъ унтараб лъимералъе операция гьабизе къватIисел пачалихъалде ине, гIадамал чияда гьардезе кколеб; азарханабазда рукIине кколел шартIал, жидецаго росани гуреб, мадарал дараби рукIунареб; бакIал гьечIолъиялъ школазда кIиго-лъабго сменаялда лъимал цIализе кколеб; интернетги хIалтIулареб, къо гьоркьоб бахъун токги ссунел, чияр мухьдахъ ккурал рукъзабахъ цIалулел ругел, магIарухъ лъималаздасаги, Москвалда киналго санагIалъаби ругел школазда, кIудиял харжалги кьун, лъик1аздаса лъик1ал мугIалимазда цере цIалулел лъималаздасаги цогояб экзаменалда цого лъай тIалаб гьабулеб улкаялда г1умру гьабунги вук1ун?! МугIалимазе коммуналиял хъулухъазухъ кьезе кколеб гIарац нилъер гьаниб моцIие 1000 гъурущалде бачана. Гьебги кьоларого бакI-бакIаздасан гIарзалги камуларо. Нилъер Рамазаница абулеб, дов Рязаналъул школалда хIалтIулев мужикасе хинлъиги канлъиги бугеб рукъ чIезабизе кколеб батани, щайха Дагъистаналда ругезе кколареб? Гьал щиб, бесдал эбелалъ гьаруралищ яги доздаса лъай гьечIелищ ругел? Гуро,гьудулзаби, республикаялде бачIараб гIарац, кколе-кколелъубе щолеб гьечIо. Гьелдаса жидее бутIа тIезабулел хIакимзаби гIемерлъун руго. Къойилго хисулел, рахъулел рукIаниги гьезулги «аппетит» гIодобго кколеб гьечIо. ЦIогьодулаго ккурасе гьабулеб тамихIги гьечIо. Бугищха гьединаб хIал цогидал регионазда? БукIине рес гьечIо.

Гьаб ахираб кIиго соналда I0-I2% къокъ гьабуна бюджеталдаса гIарац бачIунезул къадар. Чанго банк къан, гьенисаги къватIир рехана нус-нус чи. ЦIиял хIалтIизе бакIалги рагьулел гьечIо. Коммуналиял багьабиги, къо анагIан цIикIкIунел руго. Бичун босулел пачалихъазулгун кьалги ахIун, кибе кьелеяли лъаларого бугеб газалъул кубометр нилъее 4,72 гъурщиде бичулеб буго.

Гьаб ахираб заманаялъ гIадин телевизоралдаса нилъее рицунел гьерсал, дида цебе бихьараб жо букIинчIо. Цо нижехъа вас цин НТВялда, цин РенТВялда вихьизавуна Сириялда вагъулев вугев кIудияв боевик вугилан. Гьев вас, цевего доваса рокъовеги вачIун, судги гьабун туснахъалда вугелдаса лъагIелниги буго. Гьелдаго релълъараб буго Сириялдаги Турциялдаги кколеб бугелъул бицунелъулги.

Гьеле гьединаб ватIаналъе рухI кьезе хIадурал ПАТРИОТАЛ рахъинаризе ккун руго нилъеца.

«Бакъан тIамуралда тIамураб улка,

ТIуралщинал чIваби дур гIумруялъул,

Бигьаго гьабичIо дуца гьабураб,

Бигьаго ахIичIо дуца ахIараб»- ян хъвана ХIамзатил Расулица.

Кин щиб бук1аниги, ц1ик1к1агиха улкаялда ПАТРИОТАЛ.

САЙГИДАХIМАД АХIМАДНАБИЕВ, Хасавюрт район, ЦIияб Сасикь росу.