Дагъистаналъул нухазул Агентствалъул нухмалъулев, нилъер ракьцояв сахаватчи Загьид Х1ажиевич Хучбаровас к1удияб к1вар кьолеб буго ц1алул отличникал, школа лъуг1ун унезе хадусеб г1умруялда мустах1икъаб, лъайгун-бажариялда рекъараб ц1алигун х1алт1улеб бак1 бук1инабиялде. Хасго ц1акъ гьес кумек гьабулеб буго нухазул маг1ишатгун жидерго къисмат бухьине бокьарал г1олилал ясалгун васазе.
Араб 2016 соналъ лъик1ал баллалгун ЕГЭ кьурал 12 Дагъистаналдаса выпускникал лъугьун руго гьеб профилалъул Москва, Санк-Петербург, Волгоград ва гь.ц. шагьаразул ц1алул г1уц1абазде. Ва гьел киназего Загьид Х1ажиевичас кьун ва кьолеб буго: байбихьул кумекалъе (подъемные) нус-нус азарго, ва ц1алун рахъинег1ан мисалияб ц1алухъ ва хьвада-ч1вадиялъухъ щибаб моц1ие анц1азарго гъурущ стипендия. Гьеб киналъухъго хисун г1иц1го цо т1алаб буго г1олохъанал специалистаздехун – жидерго практика ва зах1маталъулаб нух гьез г1иц1го республикаялъул нухазул маг1ишаталда бухьинабизе ккей. Гьайгьай, гьеб киназего лъик1аб «даранги» ккола. Рохизе ккараб х1ужа – исана гьеб сахаватчиясул кумекалъул рич1ч1и – т1ири щвана нилъер районалдаса к1иго абутуриентасдеги. Бакьагьеч1и школа меседил медалалда лъуг1арав Мух1амадов Мухтар Мух1амадович ц1ализе лъугьинавун вуго Ю. А. Гагаринил ц1аралда бугеб Саратовалъул Пачалихъияб техникияб университеталде, Гозолоколаса Х1ажиев Х1абиб Х1амидович Кубаналъул Пачалихъияб Технологиялъул Университеталде. К1иявго г1олохъанчиясе щун буго байбихьулаб г1арцулаб кумекги, хадубккунисеб ц1алулъ г1арцулаб квербакъи-хасаб стипендия щвезе ресги. Гьаризинха ракьцоял г1олилазе жидеда гьабураб божилъи рит1ухъ гьабулеллъун, ц1алулъ ва х1алт1улъ цереселлъун рук1ине.
P.S. Газета ц1алулезул баяналъе, нухазул маг1ишаталда жидерго г1умрудул ва зах1маталъул нух бухине х1адурал, лъик1 ц1алулел г1олилазе нилъер сахаватав ракьцоясул нуц1би рагьарал руго, т1аме таваккал, пайда босе кьолеб бугеб ресалдаса.
Ф. Мух1амадова.
|