Нилъер гьайбатаб ракь раг1араб буго унго-унгояб берцинаб т1абиг1аталъул рорхатал муг1руздалъунги, г1ат1идал лъараздалъунги гуребги, ц1ар раг1арал шаг1ирзабаздалъунги. Гьезда гьоркьой йиго дунялалда ц1ар раг1арай, жиндир поэзия хвел гьеч1еб реццалъеги, ц1аралъеги мустах1икълъарай Дагъистаналъул халкъияй поэтесса жиндир мунагьал чураяй Фазу Г1алиева.

«Дие бокьилаан даим г1умруялъ, нужеда йихьизе дилъ дой маг1арул яс»-абураб темаялда Фазу Г1алиева гьаюраб къоялда хурхун Х1ариколо культураялъул ва библиотекаялъул х1алт1ухъабаз г1исинал классазул лъималазе т1обит1ана тематикияб вечер. Гьеб вечер рагьана ва лъуг1изег1ан нухда бачана культураялъул рукъалъул директор Г1абдурах1манова Хадижатица. Гьелъ цин лъималазе бицана Фазул биография. Гьелдаго цадахъ Хадижатица лъималазда бицана кинаб хурхен Фазулги х1арисезулги бук1арабали. Фазул эмен Г1алиги, Х1ариколоса Набиги рук1ана лъик1ал гьудулзаби. Гьедин Фазул эмен хваравго, Набица т1аде босула гьесул хъизан лъималазе кумек гьабизе. Наби-даци вук1ана ц1аларав, кутакалда иман-иях1 бугев чи, гьес гьезул хъизаналъе жиндасан бач1арабщинаб кумекги гьабулаан. Риидалил каникулал кьуралго гьит1ичай Фазуги гьес Х1ариколое ячунаан. Гьедин жинда бихьаралъулги бицун, пикруги загьир гьабун хъвараб буго Фазул нилъет1е гьабураб «Х1ариколо»-абураб кеч1ги. Гьеб кеч1 ц1алидал лъималазул кутакаб интерес ккана гьелъул поэзиялде ва гьезда бич1ч1ана Фазул т1оцересел, жеги школалда ц1алулел соназго хъварал куч1дузулъ гьеб бук1ин.

Фазуца к1удияб х1алт1и гьабуна рекъел ц1униялъулъги, руччаби квер г1унт1уларел борхалъиялде рахинариялъулъги, г1адамазе жиндасан бач1араб бажарараб кумек, квербакъи гьабиялъеги. Фазул асараз халкъалъул рак1азулъе лъугьинабула г1ажаибаб хинлъи цо кинабалиго канлъи. Гьелъ жиндирго асаразулъ загьир гьабулаан Ват1аналде бугеб г1орхъи гьеч1еб рокьи, г1агараб росдаде бугеб урхъи, миллаталде бугеб хинлъи. Фазул бицине ккани нилъее г1емераб заман х1ажалъилаанилан абуна Хадижатица жиндирго к1алъаялъул ахиралда.

Фазу нилъее кидаго хирияй йик1ана, гьелъул адаб-х1урматги гьабулаан. Лъик1аб рахъалъ гурони нижеда гьей кидаго рак1алдего щоларо ва рек1елъаги унароян абулеб бук1ана гьенире рак1арараз.

Фазу кидаго хут1ила районцоязул рак1азухъ ч1аго йигей г1адин. К1оченаро нилъеда гьелъул поэзиялъул борхалъи, гьелъ нахъа тараб гьайбатаб г1умруялъул нух, лъалк1 ва г1агараб район цебет1еялъе гьелъ лъураб кьуч1.

Ахиралдаги абизе ккола вечер анин ц1алдохъабазе ва гьенире рач1аразе пайдаяб ах1вал-х1алалдаян.

У. Къурамух1амадова.