Дагъистаналъул тарихалда гъваридаб ва пашманаб лъалк1 тараб лъугьа-бахъинлъун ккола Кавказалъул рагъ. Гьеб рагъулъ нилъер бах1арчиял умумуз жидерго ракьги динги ц1арги ц1унулаго бихьизабуна г1ажаибаб бах1арчилъи ва къох1ехьей. Ц1акъго нилъ рохизе ва ч1ух1изе ккараб жо буго Кавказалъул рагъул бищун бах1арчиял наибзабигун рагъухъаби нилъер районалдаса рук1ин. Гьезул тарих г1ун бач1унеб г1елалда к1очон теч1ого бук1иналъе г1оло г1емераб х1алт1и гьабулеб буго районалъул жамг1ияб г1уц1иялъ. Обществалъул х1аракаталдалъун районалда ва гьеб тун къват1ибехун зама-заманалдасан г1уц1ула г1олилазул диниябгун-рух1ияб рахъ борхизабиялъул мажлисал. Гьединаздасан цояблъун бук1ана дагьаб цебег1ан Гиничукь т1ибит1араб мажлисги.
Гьеб г1уц1ун бук1ана Шамил имамасул машгьурав наиб Инквачил Дибир гьавуралдаса 200 сон т1убаялъул х1аракаталда, гьенибго рагьана Кавказалъул ва К1удияб Ват1анияб рагъазулъ г1ахьаллъи гьабурал гинчадерил ц1арал т1ад хъвараб мемориалияб комплексги.
Тадбир рагьана ва ахиралде щвезег1ан берцинго нухда бачана гинчадерил росдал дибир Нурудин Нурудиновас. Данделъарал Ват1ан бокьизе ва рух1иябгун моралияб тарбиялде ах1арал к1алъаял гьаруна Дагъистаналъул муфтий – шайих Ах1мад-х1ажи Г1абдулаевасул кумекчи Казимх1ажи Темирбулатовас, муфтияталъул муг1рузулаб территориалияб округалда вугев вакил Х1асан-х1ажи Мух1амадовас, Хунзахъ ва Хасавюрт районазул имамзаби Шамил-х1ажи Сурхаевас ва Ах1мад-х1ажи Г1абдурашидовас ва цогидазги. Маг1на бугел к1алъаял гьаруна К1удияб Ват1анияб рагъул г1ахьалчи Мух1амадрасул Гьиматовас, журналист ва г1алимчи Шамил Мух1идиновас, машгьурав тарихчи Г1алибег Хъазанбиевас ва хундерил бегавул Т1алх1атов Хизрица.
Тадбиралъул ахиралда гьеб г1уц1изе кумек гьабурал гинчадерил росдал жамаг1аталъе, мемориал базе г1арцудалъун кумек гьабурав районалъул бет1ер Саг1ид Юсуповасе ва ах1и басра гьабич1ого ваг1за-насих1атгун мажлисалде г1ахьаллъи гьабизе рач1арал г1алимзабазе баркалаги кьун к1алъана обществалъул Ах1мад Х1усенов, гьединго гьабуна дуг1аги.
Мажлис ана т1адег1анаб даражаялъул г1уц1иялда.
И. Мух1амадов.
|