Дагьаб цебег1ан Хунзахъ музеялда т1обит1ана «Музеялъул сордо» абураб тадбир. Гьелда г1ахьаллъи гьабуна районалъул нухмалъулес, гьесул заместителаз, райадминистрациялъул отделазул нухмалъулез, жамг1иял х1аракатчаг1аз ва цогидазги.
Тадбир байбихьана «Ханасул минаялъуб бика хъами» абураб квесталдасан х1ай. Гьеб г1уц1ун бук1ана райадминистрациялъул культураялъул отделалъул ва г1олилазул комитеталъул х1аракаталдалъун. Кинабниги х1аялда г1ахьаллъи гьабуна ункъго командаялъ. Жюриялъул т1алабазда рекъон саг1аталда жаниб командабаз т1уразаризе кколаан бат1и-бат1иял т1адкъаял. Гьедин киназдасаго хехго т1адкъаялги т1уразарун квесталда бергьенлъи босана рагъулабгун-спортивияб школалъул «Лицеисты» командаялъ.
К1иабилеб бак1 щвана районалъул МФЦялъул коллективалъе; лъабабилеб бак1алде бач1ана «Патриоты» команда. Районалъул администрациялъул рахъалдасан бергьараб команда г1арцулаб сайгъаталдалъун ва грамотабаздалъун к1одо гьабуна, гьединго грамотабиги театралде билеталги кьуна призалъулал бак1ал ккурал командабазеги.
Хадуб байбихьана музеялъул сордо к1одо гьабизе. Саг1ид Юсуповас киназдаго баркана музеялъул къо ва бицана г1ун бач1унеб г1елалда умумузул г1адаталги рук1а-рахъинги к1очон теч1ого рук1ине гьадинал тадбиразул бугеб к1варалъул.
Хадуб данделъаразда бихьизабуна араб соналъ районалда наиб Х1ажимурад гьавуралдаса 200 сон т1убай к1одо гьабулаго бахъараб фильм. Рагьана К1удияб Октябралъулаб революциялъ 100 сон т1убаялде х1адурараб ц1ияб залги. Гьенир къадада ран ругоан советияб пачалихъалъул цебет1еялъул бицунел плакатал. Тадбиралъе хасаб берцинлъи кьун бук1ана культураялъул х1аракатчаг1аз бихьизабураб концерталъги. Ахиралда киналго г1одор ч1ана бечедаб умумузул кванил тепсиялда нахъа.
Жакъа киназдаго умумузул лъик1ал г1адаталги, ях1-намусги, квен-т1ехги, рук1а-рахъинги, кеч1-бакъанги к1очон толеб заманалдахьул буго, гьадинал тадбираз нилъ маг1арулал рук1ин рак1алдаса ине биччаларилан.
И. Мух1амадов
|