Нилъер улка бечедаб буго махщелчаг1аз ва устарзабаз. Кинабго махщалие байбихьи лъола школалъ, бухьараб бук1уна учительзабазда. Нижер школалъул бицунаго бищунго цебе рак1алде бач1унеб ц1ар ккола г1умрудул 60 сон школалъе кьурай Умужат Къасумовна.
Умужат Къасумовналъ нахъа тана зах1матаб ва бечедаб х1алт1ул нух. Учительлъиялде т1оцебесеб гали т1амуна Хьини росдал байбихьул школалда. К1вах1 гьеч1ого хьвадана гьей кьурабалъанги, парсахъанги, к1к1алазул сухъмахъ нухаздасанги жиндирго ц1алдохъабазухъе ва хирияб школалде.
1954-2014 саназ Умужат Къасумовна х1алт1ана Г1арани гьоркьохъеб школалда. Гьей школалде яч1арал саназ интернаталда лъималазул къадар 200 г1анасеб бук1ана. Гьел рук1ана цо Хунзахъа гурелги цоги-цогидал районаздасаги ц1алдохъаби. Эбел-эмен аск1ор гьеч1ел, лъаг1алида жаниб цо каникулаз гурони рокъоре руссине рес гьеч1ел гьел лъималазул школалда лъугьун бук1ана цо хъизан. Умужат Къасумовна к1вах1 тун х1алт1ана учительлъунги воспитательлъунги, эбелалъ г1адин т1алаб гьабуна ц1алдохъабазул. Лъималаздехун бугеб рокьи бихьулаан гьелъ классалдаги класс тун кьват1ибехунги лъималазул гьабулеб бук1араб т1алаб-агъазалъулъ.
Мун интернаталде гьал лъималазе
Эбеллъун яч1ана бищун х1еренай.
Щиб къвариг1аниги кумек гьаризе
Гьудуллъун йик1ана бищун цеесей.
Гьурмахъ балагьидал бич1ун лъалаан
Лъил къварилъи жакъа, лъил роххел бугеб,
Щив х1адурун вугев, щив к1ух1аллъарав,
Щай ясалъул берал маг1ил ц1ун ругел,
Дур г1ат1идаб рек1елъ г1ун бук1ана бак1
Киналго рак1арун данде гьаризе.
Лъик1алин квешалин ц1арал ч1вач1ого
Ц1умур кьабун къват1ий т1орит1ана гьел.
Нилъер г1ат1идаб ват1аналъул г1емерал шагьаразда тана жидерго сахаватаб лъалк1 Г1арани школалда ц1аларал Умужат Къасумовнаялъул ц1алдохъабаз. Кире щваниги гьезул рек1елъ хут1ана жидерго учителасул мисал. Гьезда гьоркьосан Хучбаров Загьид-кьоял ралев устар, Гьит1инов Гьит1ич-гамил капитан, Мах1муд Апанди-шаг1ир, Г1алибегов Г1амир ва Мух1амадов Жаватхан-врачал ва гьел гурел жеги г1емер бат1и-бат1иял махщалил устарзабазул жакъа къоялде щвезег1анги бухьен хут1ана школалъулгун ва учителасулгун.
Х1алт1улъ щварал бергьенлъабазухъги бажари бугел ц1алдохъаби куцаралъухъги Умужат Къасумовна мустах1икълъана «Отличник народного образования СССР» абураб х1урматалъул ц1аралъе.
Школалъул х1алт1ухъабазги ц1алдохъабазги баркулеб буго Умужат Къасумовнаялда учителасул къо ва х1алт1улъ 60 соналъул юбилей, гьарулеб буго гьелъие халатаб г1умруги чорхое сахлъиги.
Мустах1икъай муг1алим, Умужат Къасумовна
Баркула, Умужат, дуда гьаб байрам
-Муг1алимлъиялъул лъабкъоябго сон
Г1олилал куцараб зах1маталъул нух
Сверун батаги дур лъик1аб рахъалде.
Лъабкъоябго соналъ дуца кьураб лъай
Лъун буго г1олилаз г1умрудал нухда,
Г1адамал разиял х1алт1и берцинал,
Бицаде ратана дур ц1алдохъаби.
Дуца лъай кьунщинал ц1алдохъабазул
Ц1ик1к1унисел гьанже хъулхъазда руго
Адаб-хъатир бугел г1аданлъи т1ок1ал
Г1олилал куцайдал кидаго дуца.
Росе мисалалъе Загьидгун Гьит1ич,
Гьезул гьунаразул гьеч1ищ кибго ц1ар,
Кинаб хъулухъалда ратананиги
Ратула мисаллъун дуца куцарал.
Мун историялъул учительница,
Инсанияталъе г1акълу-лъай кьурай.
Кьеги дуй Аллагьас жеги нахъеги
Гьедиг1анаселго т1адеги сонал
Дуе сахлъи кьеги г1алам урхъараб,
Аллагьасул рахъалъ кири ц1ик1к1араб.
Кидагоги таги мун рохалида
Халатал сонал кьун, сахлъи чорхой кьун.
ГIарани школалъул коллектив.
| 
