Пулеб-балеб г1азул къо бук1ана. Х1ерха-двариялда редакциялде жаниве лъугьун вач1ана районалъго х1урмат гьабулев, ч1ух1араб ансадерил г1ансиде къуларав, къадруяб хъах1аб магжил аксакал. Т1аде баччараб цо ургъел бук1инч1ебани, гьаб зампариялда к1удияв къват1иве вахъинароанилан дица бахъа-батана гьесул мурад. К1иго лъаг1елалъ цебе         абураб росулъа цо цили-гъуни г1адав г1олохъанчияс васасе хъизан г1уц1изе х1ажат бугилан рак1 гурх1илеб хабар бицун ва моц1ида жаниб налъи нахъбуссинабиялъе раг1ул бет1ергьан жив вугилан хъализабула дир гьоболасухъа таманаб къадар г1арцул. Гьесарав чиги вугин, досул г1умруялда х1ажалъабиги дагьал ратилин, ……сес бач1унаро налъи я к1иго, я лъабго моц1идасан. Щибаб к1удияв чияс бит1араб ругьелалъе къохьокуцас бач1унеб бук1ана цо ккураб, доб жиндица нахъбуссинабилин кьварун кьураб бихьинчиясулаб раг1и хисаниги, хиса-свери, тари гьеч1еб «метер кьела, сезе кьула» ян жаваб. Щибин гьабилеб, внук гьавидалниги кьелеб батилин налъулас пенсиядул кепкал данде к1ут1ун бак1арараб жиндирго х1алалаб рикъзиян хьулал къот1уларого вук1уна херав лъаг1ел лъуг1изег1анги. Уна саг1талги, уна къоялги, уна моц1алги…   …сев вихьулеб ракьалде къаларо. Цощина ИГИЛалъул кьеразде ун, чияр ракьалда боркьараб рагъулъ гьоркьов инавунярун вугодаян чара хварав аксакал вортула дов бахьикъос ц1ехезе сельсоветасухъе. Лъала х1албохад, к1иабилевгицин внукги чура-хулун, кванан-гьекъон лазаталда вук1ин. Рух1иял церехъабазниги кант1изавилародай дов «жиндирго раг1ул бет1ергьан», к1иго лъаг1ел сверизе къоял хут1идал, гьезда гьарула к1удияс кумек. Гьазги гьасухъе справка кьезе дагьалъ хут1ула доб дунялалда «кассаялда» г1одов ч1ун вук1ине жеги лъик1 гурищ дуеян. Жиндирго харбил гьеб бак1алда гьобол дихъ валагьана ва гьесул кенч1олел бераздасан дида бич1ч1ана досул т1убанго хьулги къот1ун рак1ги бакъван бук1ин. Гьесул рак1 батизабизеян абундачги т1амуна дица:

«Дандч1ван вуго к1иго гьудул. Цояв цоясда:

-Вах1, можник1 к1очон бихьуларищ, метерлъаг1ан цо нусго гъурущ кьералищ?

-Узухъда, гьудул, ма босе.

Нахъисеб къоялъ довго к1иявго.

-Г1енекке, дица дуе 100 гъурущ кьезе гурищ бугеб?

-Уха.

-Кье цоги нусго, к1инусго нахъбуссинабила.

-Ма, босе.

Лъабабилеб къо

-Дица дуе 200 гъурущ гурищ кьезе бугеб?

-У.

-Давай дуца дие цойги 300 гъурущ кьезе, дир налъи 500 гъурщида бащадаб бук1ине.

Гьав гъарим разилъула нахъойги.

Ункъабилеб къо.

-Ле, гьудулав чи, дица дуе щунусго гъурущха кьезе бугеб, гурищ?

-У, ле.

-Цойги щунусго дуца кьуни, азарго гъурущ бук1инаха дида т1ад дуе бугеб налъи…

-Ма, вац босе, щиб гурин дуда гьабилеб...

Нахъисеб къоялъ ав ничгьеч1 нахъойги:

-Дица дуе 1000 гъурущ гурищ кьезе бугеб?

-Вай гьеч1о, гьеч1оооооо! Те дун.

Гьимич1о дир гьобол, киг1ан артистлъи х1ан дица анекдотал къираниги. Нуц1ихъан гьесул мугъ т1ерхьарабго, къалам кодобе босана дица газеталдасан гьал мухъал хъвазеян. Ле, …сев, нахъбуссинабе к1удиясул г1арац. Гьабич1они нахъосалда дур сипаталъ берцин гьабизе буго гьадингоги нич т1аг1араб «Къохьокуц».