Гьал г1агарал къоязда Х1ариколо культураялъул рокъоб, Буц1ра, К1ахъ, Х1ариколо, росабазул х1аракатчаг1аз жамаг1аталда ва т1аде рач1арал гьалбадерида бихьизабуна цересел умумузул бищун аваданаб ва бокьулеб оцбаялъул байрам кин т1обит1улеб бук1арабали. Гьединго гьеб мажлисалда г1ахьаллъизе рач1ун рук1ана районалъул Ш. Шамхаловасул ц1аралда бугеб культураялъул рукъалъул театралияб коллективги. Гьез г1одорч1аразда бихьизабуна «Муг1рузул Г1али» абулеб спектакляздаса цо гьит1инабго бут1аги. Гьеб тадбир т1обит1улеб бук1ана киса-кибего Дагъистаналда исана Муг1рузул сон к1одо гьабулеб бук1иналда бан, нилъеда умумузул г1адаталги, г1адамазул рук1а-рахъинги к1очон тун ругищали лъазелъун, г1олеб г1елалда гьел г1адатал рак1алде щвезари мурадалда.

Лъик1аб бук1инаан гьел г1адатал ва оц баялъул байрамкъо кин т1обит1улеб бук1арабали сценаялдасан гуреб, бук1ине кколеб къаг1идаялъ районалъул щибаб росулъ к1одо гьабун бук1арабани. (Масала Гьоц1алъ, Гьамущи росабалъ г1адин). Гьелъ рес кьелаан росабазда гьоркьоб гьудуллъи-вацлъи щулалъизе, росдал маг1ишаталдехун бугеб бербалагьи хисизе, зах1мат бихьич1ого рах1ат бук1унареблъи бич1ч1изабизе.

Кин бук1аниги, культураялъул х1алт1ухъабаз гьел г1адатал к1оченч1ого рук1ине х1алт1и гьабун бугелъул, гьезие баркалаги кьун, росабазул жамаг1атазда гьаризе бокьун буго гьел цересел умумузул г1адатал к1оченч1ого рук1ине мурадалде щвараб х1алт1и гьабейилан. Гурого нилъеда лъала аралде туманк1 реч1ч1аразда, бач1унелъ г1арададул гулла балеблъи. Рук1инин нилъер умумузул лъик1ал ирсилаллъун. Гьаниб бак1 ккун бук1аго абизе ккола, нилъер аниб цо-цо бак1азда-дица цере рехсараб росабалъ оц баялъул иххдалил байрам ц1илъулеб бугилан. Амма умумуз бицунебг1адаб роххел-аваданлъи, г1адлу-низам, г1уц1а-к1ут1и гьелъулъ жеги гьеч1о. Гьеч1о оцбаялде цебеккунго гьабулеб х1адурлъи, чуял, гьаби хьихьи, оцаз рахъ бай, рекеризе, к1анц1изе ва цогидалги къецазде ругьунлъи, х1адурлъи, «Галочкаялъе г1оло», лъиеялиго отчет кьезе т1орит1улел «мероприятиязда» релъине гьабулеб буго гьеб ц1акъ умумузе хирияб бук1араб т1абиг1ат ч1аголъиялъул байрам.

Ахиралда абизе ккола Х1ариколо росулъ кеч1-макъаналъулги, кьурди-хъаталъулги сас нахъалъаг1ан къот1ич1илан. Жидее г1уц1араб х1ухьбахъиялъухъги, аваданлъиялъухъги х1арисез т1аде рач1арал гьалбадерие ва районалъул культураялъул рукъалъул х1алт1ухъабазеги рак1-рак1алъулаб баркала загьир гьабулеб бук1ана.

У. Къурамух1амадова.