Дагьал церег1ан къояз районалъул библиотекаялъул х1алт1ухъабаз жидерго т1ахьал ц1алулел школлъималазда гьоркьоб т1обит1ана «Лъимал терроралде данде» абураб ах1иялда гъоркь конкурс. Терроризм – ч1ах1иязе къварилъи-ургъел бугеб балагь бук1аниги, лъималазе гьеб ккезехъин буго х1акъикъияб лъугьа-бахъинлъун, г1исинккун ч1вай-хъвеялде, кьвагьа-г1анхъиялде ругьунлъулел руго гьел. Гьеб буго т1оцебесеб иргаялда нилъ ч1ах1ияз биччазе, гьукъизе кколеб жо. К1иабизе абуни, терроризмалъул бугеб заралги вах1шилъиги нилъеца лъималазда жакъа бич1ч1изабизе кват1ани, гьелъ кинаб пашманлъиялде метер рачунебали киназдаго бич1ч1улеб батила. Гьединлъидал гьеб бич1ч1и кьеялъул х1алт1и гьаби мурадалда библиотекаялъул х1алт1ухъабаз т1обит1араб конкурсалде гъорлъе бачун бук1ана лъималазул бераздалъун кинан гьезда терроризм абураб раг1ул маг1на бич1ч1улебали асфальталда суратал рахъи.

Абизе ккола лъималаз жидеда цебе лъураб  масъала т1ок1 борч1унги т1убазабунилан. Х1акъикъаталдаги гьез махщалида, рак1 унтун рахъарал суратазулъ бихьулеб бук1ана, терроризмаялде данде лъималазул бугеб рокьукълъи, гьезие рекъел х1ажат бук1ин.

К1иабилеб – «Родной поэзии живительное слово» абураб конкурс гьез т1обит1ана лъималазул библиотекаялъул минаялда чаялъул чашкаялда нахъа г1одорги ч1ун. Школлъималаз г1одорч1аразе рик1к1ана г1агараб поэзиялда, хирияб т1алъиялде, вах1шиял террориcтазде гьарурал бат1и-бат1иял куч1дул. Панаго, берцинго махщалида лъималаз рик1к1унел коч1ол куплетазухъ г1енеккараб мехалъ бихьулеб бук1ана жалго ч1ах1иязул гуребги, лъималазул бадибгицин маг1у хулун бук1ин. Мажлисалъул ахиралда цере республикаялда ва районалда т1орит1арал церехун рехсарал конкурсазда г1ахьаллъарал школлъималазе библиотекаялъул заведующая Къебедова Написатица кьуна дандрекъон кколел даражабазул дипломал, грамотаби ва къиматал сайгъатал.

Махщел бахчун, нахъе лъун теч1ого конкурсазда хадурккунги г1ахьаллъизе рач1ин мурад бук1ин загьир гьабуна гьелъ ахиралда.

Баркала буго лъималазул библиотекаялъул заведующая Къебедова Написатие ва х1алт1ухъабазе санайил гьединал пайдаял мажлисал лъималазе г1уц1аралъухъ, нилъер г1олеб г1ел бит1араб тарбия-лъай кьун нухда т1орит1аралъухъ.

У. Къурамух1амадова.