Дагъистан республикаялъул Зах1маталъулгун социалияб рахъалъ цебет1еялъул министерствоялъ ва Социалияб страхованиялъул фондалъ федералияб программаялда рекъон гьал къоязда 29 «Лада Гранта» автомашина кьуна х1алт1улъ сакъатлъи ккарал инвалидазе.  Тадбир т1обит1ана Мах1ачхъалаялъул «Ладаялъул» официалияб дилеразулаб централда. Социалияб страхованиялъул фондалъул Дагъистаналда бугеб отделениялъул нухмалъулев Г1усман Эфендиевас бицана гьединал автомашинаби сайгъат гьари кколин инвалидазе кумек гьабизелъун г1уц1араб пачалихъияб программа г1умруялде бахъинабиялде т1амулеб галиян. «Гьадинал тадбирал т1орит1и лъугьана лъик1аб г1адатлъун ва гьел т1орит1улел  руго 2001 соналдаса байбихьун. Гьеб заманалда жаниб х1алт1улъ сакъатлъарал  г1адамазе кьуна 344 автомобиль, жеги 29 «Лада Гранта» маркаялъул  автомобилал кьезе руго жакъаги. Ниж ц1акъ рохарал руго нужее гьадинал сайгъатал гьаризе рес щвеялдаса. Щибаб анкьго соналда жаниб инвалидазе ихтияр буго ч1обого гьадинал машинаби щвезе»,- ян абуна гьес.

Республикаялъул Зах1маталъулгун социалияб цебет1еялъул министр Хасбулла Х1ажигишиевас жиндирго к1алъаялда к1вар кьуна жакъа къоялъ автомашина г1адамазе, хасго  инвалидазе чара гьеч1ого х1ажатаб жо бук1иналде. «Пачалихъалъ жакъа к1удияб х1аракат бахъулеб буго инвалидазе социалияб кумек гьабиялде. Россиялъул Зах1маталъул социалияб рахъалъ ц1униялъул министерствоялъ г1емераб х1алт1и гьабулеб буго инвалидал х1алт1удалъун хьезаризе, гьезие лъай кьезе ва цогидалги х1ажатал шарт1ал ч1езаризе. Бокьун буго нужеда гьединаб лъик1аб лъугьа-бахъине баркизе ва щулияб сахлъи гьаризе»,-ян бихьизабуна гьес.

Щибаб машинаялъул багьа ккола 513 азарго гъурущ, киназдаго руго автоматикияб передачабазул коробкаби, кондеционерал, антиблокировочнияб тормозазул система. Машинабазул бет1ергьабилъун рахъаразул анц1ила цояв ккола Мах1ачхъалаялдаса, хут1арал ункъоял руго республикаялъул цогидал шагьараздасагун районаздаса. Гьезда гьоркьов вуго нилъер районалъул Сивухъ росулъа,  районалъул газеталъул сайт бачунев, патриот Г1алиев Мух1амадги, гьесие гьединаб сайгъат щвана лъабабилеб нухалда. Инвалидазе машинаби кьеялъул тадбир т1обит1ана Мах1ачхъалаялда «Ладаялъул» официалияб дилеразулаб централда. Рак1-рак1алъ баркула нижер пишацоясда, лъик1ав инсанасда гьеб г1умру пайдаяб лъугьа-бахъин. Гьарула гьесие щвараб сайгъат жеги лъик1алъ хисулеб къо кват1угегиян. Чорхолъ витун таги мун, Мух1амад,  дудаго ч1алг1инег1ан.

Редакция.