Дагьаб цебе  дица районалъул нухазул участкаялъул нухмалъулев Сайгидов Мух1амадилгун гьабураб гара-ч1вариялда, Мух1амадица бицун бук1ана Хунзахъ росулъ жаниб  къач1азе рак1алда ругел нухазул х1акъалъулъ. Гьале гьал къоязда райцентралда хъил т1ун бахъунеб буго Хунзахъ № 2  гьоркьохъеб школалда цебеса бахъараб Абулмуслим-щайхасул зияраталда цебебек1ги гъорлъе  бачун Г1акаро  тукаде цебе щвезег1ан.

Радал саг1ат 6 т1убаралдаса къаси саг1ат 11-12 т1убазег1ангит гьалараб бакъакь ч1еч1ого х1алт1ана дорожникалги  Ч1удалъ авалалъул г1олохъабиги.

Х1алт1аби  байбихьилалде цебе раг1а-ракьанде щун киса-кибего кьищни-къулалдаса бац1ц1ад гьабунила къват1илан  бицана гьенив х1алт1улев вугев ветуправлениялъул х1алт1ухъан Х1усенов Дибирица. Щивасул рукъалде цебещун,, киса-кибего г1олохъабаз баччун, бит1изабун ц1вак-ц1вакизабуна нух. Дорожниказдаса къеч1ого х1алт1ана авалалъул бихьинал. Гьез к1удияб баркала кьолеб буго гьабулеб х1алт1иги бихьизе, х1ажатабги ц1ехезе гьенире рач1арал районалъул бет1ер Саг1ид Юсуповасе, Мух1амад Сайгидовасе, бегавул Хизри  Т1алх1атовасе. С. Юсуповас г1адамазе лъик1лъи бук1инелъун, минабазда цебеги, кибего  щвезабун т1ейин хъилин абун разиго  ругоан г1олохъаби.

Авалалъул г1адамаз к1удияб баркала кьолеб буго гьенир х1алт1арал дорожниказе, мастер Г1усмание, киналго авалалъул г1олохъабазе. Бокьун буго хас гьабун к1удияб баркала кьезе сахав инсан Х1усенов Дибирие. Дибир вуго авалалъулго ургъел гьабулев, трансформатор бух1аниги, монтеразда цадахъ гьеб къач1алев вук1унев, киб-щиб кканиги вортун  вач1унев, бокьараб х1алт1улъ жувалев, мадугьалихъ ругел харабазул т1алаб-агъазалда вук1унев рак1 лъик1ав инсан.

Гьале дорожниказда цадахъ х1алт1улев вугев Дибирица бицана авалалъе г1олеб-г1оларелъул.

Авалалда, хасго хасало, к1удияб къварилъи бук1уна трансформаторалъул. Араб хасалоги лъабго нухалъ бух1ана гьеб. Гьелда хурхун кида аск1оре аниги рехун теч1о росдал бегавул Т1алх1атов Хизрица ва токалъул х1алт1ухъабаз. Цебеги гьарурал х1алт1абазухъ к1удияб баркалаги кьолаго, авалалъул г1адамазул токалъул г1уц1иялъул нухмалъиялде, Т1алх1атов Хизриде к1удияб гьари буго хасел щвелалде 400 КВталъул трансформаторалъул бак1алда 600 КВталъул лъеян. Гьединго х1ажат буго Ч1удалъ авлалда ругел турун квешго ругел, т1аде чи вахине х1анкъи бугел токил х1убал хисизеги.

Рак1алде ккола нух къач1ан рохарал г1адин, г1адамазул гьариги къабул гьабун, токалъул масъалаги т1убан рази гьарилан г1адамалин.

П. Гунашева.