Лъиего балъголъи гуро г1ун бач1унеб г1елалъе тарбия кьеялъулъ ригь арал г1адамазул бук1унеб к1вар. Г1адат х1исабалда, гьаб ахираб заманалда хут1изег1ан, цониги к1вар бугеб иш унароан ригь арал г1адамаз г1ахьаллъи гьабич1ого. Гьел рук1унаан бищунго х1урматияб ва къадруяб бак1алда г1одорч1езарун. Гьезул мисалалда ц1унулаан умумузул г1адаталги г1аданлъи-нухги. Кинаб бугониги даг1ба-къец унароан гьел гъорлъ г1ахьаллъич1ого. Гьел рук1ана ва руго насих1атчаг1иги.

Хунзахъ росулъа рак1 бац1ц1адал, х1урматияб къаг1идаялда г1умру т1амурал г1адамазул бицунелъул, гьединазда гьоркьов рехсезе мустах1икъавлъун дида вихьизавуна зах1маталъул ветеран Х1асанх1осенов Х1амзат. Кив х1алт1улев вугониги, гьес бихьизабунин жавабчилъи, т1аде босараб иш раг1алде бахъинабич1ого ч1езе бокьунгут1и. Мисалалъе босани, росабалъ мажгитал разе изну кьураб заманалда, цебехъанлъиги бихьизабун, т1оцеве Х1амзат лъугьуна т1аде босун росдал болмажгит гьабизе. Жиндирго машинаги бачун Мах1ачхъалаялде, Буйнакскиялде ун, гьес балагьула мажгит ц1и гьабун къач1азе материал. Живго кверда махщел бугев чи вук1иналъ, щибниги г1арац босич1ого, ч1обого чанго соналъ мажгит ц1и гьабун къач1ан бахъинег1ан рак1 бац1ц1адго гьабуна гьес гьениб х1алт1и. Гьеб гуребги, Х1амзат вуго бусурбанаб г1амалалъул, дунялалъул боц1уда хадув лъугьун векерахъдич1ев чи.

Чанго соналъ Х1амзатица гьабуна Хунзахъ росдал советалъе нухмалъиги. Гьенив х1алт1улеб мехалдаги гьев вук1ана т1екъаб-мекъалда рекъоларев, бадибе раг1и абулев чи. Х1амзат гьенив х1алт1улелъул к1удияб х1алт1и гьабуна росдал хабзал сверун къач1аялъе, иццахъ лъим ч1езабиялъе, гьел берцинго, рац1ц1адго ч1езариялъе. Х1амзатица росдал советалъе нухмалъи гьабулеб заманалда магъил г1адлу ц1акъго лъик1 бук1унаан. Гьев росдал г1еласдаса хадув сверунги, къаси мехалъ унгицин нахъе гъолаан магъилъа боц1и. Боц1уда, бачазда, оцазда хадуб вехь тун, гьеб ишги мух1канго роц1ц1инабулаан.

Х1амзат вуго мадугьалзабазе, росуцоязе кумек к1удияв чиги. Кинаб х1алт1и гьабеян гьесухъе аниги, гьес гьеб гъираялда къабул гьабич1ого толаро.

Х1амзат ккола исламияб диналъул аслиял рукнабазул цояблъун кколеб х1еж борхарав чиги. Гьев цадахъ 2 гьалмагъги вачун (Байикьа Х1ажиги машинаялда ун рук1ана х1еж борхизе. Рук1ине кколел т1алабазда рекъон гьебги т1убан т1ад вуссарав Х1амзат, жеги ц1ик1к1ун дин-исламалде гъорлъе лъугьана.

Х1амзатие бокьуларо къвариг1ел гьеч1еб хабар-к1ал бицун годек1абахъ, бак1-бак1алда г1одов ч1ун вук1ине. Эркенаб заманалда гьев вук1уна Т1адег1анав Аллагьасдеги вуссун рокъов. Камуларо рокъоса-г1ебеде гьабулеб г1иси-бикъинаб х1алт1иги.

Гьал къоязда Х1амзат дагьав сахлъи гьеч1ого вегун вуго. Гьарилинха гьев рак1 лъик1ав инсанасе чорхое сахлъи, рак1алда ругел мурадал т1ураги гьесул, гьабулелъулъ бит1 ккаги. Амин.