Тарбияч1ужу ккола лъималазда сверухъ бугеб дунял лъазе, бихьизе, пикру гьабизе, бич1ч1изе, гьел церет1ураллъун, лъай бугеллъун лъугьине кумек гьабулей педагог. Киг1ан лъик1 гьелъ гьеб гьабулеб батаниги, гьедиг1ан лъик1 бич1ч1ула лъимералда сверухъ бугеб дунял, т1абиг1аталъул берцинлъи ва гьелъул х1икмалъи, бат1а бахъизе лъала лъик1абги квешабги.

Лъималазда гьеб ц1акъго лъик1 бич1ч1ула г1адатияб къаг1идаялда, г1умруялда дандч1валеб х1исабалда малъизе лъалеб бугони.

Гьал къоязда Хунзахъ № 3 «Ласточка» ясли-ахалда т1обит1ана «Лъаг1алил тарбияч1ужу - 2016» конкурс. Гьелъул мурадлъун бук1ана творческияб гьунар бугел загьир гьари, цебе т1ураб педагогикияб х1албихьи цоцазухъе кьей, педагогазул х1алт1уде рокьи бижизаби.

Тарбиячаг1азда гьеб х1урматияб тадбир баркизе рач1ун рук1ана районалъул лъай кьеялъул отделалъул информациялъулгин методикияб централъул начальник Жавгьарат Хъайитмазова, методикияб централъул школалда цебесеб лъай кьеялъул рахъалъ специалист Хатимат Г1амирханова, Г1обода ясли-ахалъул заведующая Гунашева Сабигат, лъимал церет1езариялъул централъул к1удияй воспитательница Пат1имат Хъайитмазова. Гьелго рук1ана жюриялдаги.

Конкурсалда г1ахьаллъана Мирзоева Сакинат Г1умаровна, Лъаг1илухъ ясли-ахалъул тарбияч1ужу, Г1абдурах1манова Булул Нурмух1амадовна, Гиничукь Фазу Г1алиевалъул ц1аралда бугеб ясли-ахалъул тарбияч1ужу; Абакарова Марьям  Мух1амадовна, Шотода «Улыбка» ясли-ахалъул тарбияч1ужу; Гайдалова Пат1имат Свелебандибировна, Гьоц1алъ «Ивушка» ясли-ахалъул тарбияч1ужу.

Конкурсалъул т1оцебесеб къоялъ тарбиячаг1аз «Хобби - клуб» абураб номинациялда бихьизабуна жидер бищунго рак1 т1аде ц1алеб, жидее бищунго бокьулеб кверзул, к1алзул махщел-гьунар.

Т1оцебе цее яхъарай Мирзоева Сакинатица бихьизабуна куназул, бисеразул, кагътил, ххамил рет1ел букъун жиндирго махщел гьаризе лъалел алатал.

Балагьаразул ц1акъго т1аде бер ц1алеллъун рук1ана гьелъул ц1улада т1ад накъищал рахъун, г1ег1учазул, ракушкабазул, буцараб ролъул кумекалдалъун гьарурал х1алт1аби. Гьеб киналдаго т1адеги Сакинатица бихьизабуна куч1дул гьаризе жиндирго бугеб махщелги. Гиничукь ясли-ахалъул тарбияч1ужу Г1абдурах1манова Булулица бихьизабуна конструированиялъе, оригамиялъе жиндирго бугеб махщел.

Шотодаса Абакарова Марьямица балагьарал рази гьаруна куназ берцинго угьун, букъун кагътил оригамиялъе бугеб махщел бихьизабун. Гьеб гуребги, жинда хъумузалда макънал рачине лъалилан абуна Марьямица, гьеб жюриялда араб соналда бук1араб конкурсалдаги бихьун бук1ана.

Гьоц1алъ Гайдалова Пат1иматица балагьарал г1ажаиблъизаруна г1арцул т1аг1алаби гьаризе, бисералъул, кагътил, х1ат1ул кумекалдалъун жиндаго гьаризе лъалел кьер-кьерал алатал рихьизарун.

К1иабилеб, «Дир педагогикияб кредо» бут1аялда тарбиячаг1аз балагьаразе бицана щай жидеца педагогасул махщел т1аса бищарабали. Лъималазе тарбия кьей – гьеб  к1удияб жавабчилъи ккола. Т1арбияч1ужуялда цебе г1иц1го лъимер гуро бук1унеб, гьеб ккола вук1инесев инженер, врач, политик, г1адатияв хъулухъчи. Кинаб къисмат гьесул кканиги, гьеб бараб бук1уна эбел-инсудаса хадуб тарбияч1ужуялда.

Занятие бачунелъул щияй тарбияч1ужуялъ бихьизабуна гьанжесел ц1иял т1алабазда рекъон лъималазулгун гьоркьоблъи батизе, ц1ияб дунялалде гьел лъугьинаризе жидерго бугеб махщел.

Мисалалъе босани, «Лъел къат1раялъул сапар» абун ц1ар лъураб занятиялда Сакинат Г1умаровнаялъ лъималазул лъай-хъвай гьабуна  лъел ва гьелъул г1аламаталгун. Гьелда гьелъ лъимал ругьун гьарулел рук1ана жидерго калам бит1ун г1уц1изе, малъулел рук1ана ц1и-ц1иял раг1аби. Гьелдаго цадахъ гьелъ лъималазул к1вар буссинабуна т1абиг1аталъул х1икмалъабазде: бакъ, ц1ад, гьури, гъут1би, т1амхал, щай гьел гъот1одаса гъунел ва гьел гурел суалазе жавабал рагьун.

Марьям Мух1амадовнаялъ «Маргьа-тарбия кьеялъул гучаб алат» абураб занятиялда лъимал квердеги росун, бит1ахъе гьезухъе рак1 кьураб г1адаб асар лъугьинабуна. Гьелъ лъималазда бич1ч1изабуна маргьабазул кумекалдалъун гьит1иназда гурх1изе, к1удиясул адаб гьабизе ккеялъул, сверухъ ругел къварид гьаризе бегьунгут1иялъул, ккараб мехалда цоцазе х1алае рахъине ккеялъул, цоцазе лъик1лъи гьабизе ккеялъул.

Пат1имат Свелебандибировнаялъ гьит1ичазул пикру г1унт1изабуна мисалал рачун цоцазда гъорлъ лъик1 рук1ине, цоцазе кумек гьабизе, цоцазе рокьизе ккеялде. Гьедин, гьелъ бихьизабуна жинцагоги тарбия рокьигун кьолеб бук1ин.

Киналго тарбиячаг1азул занятиялъул г1уц1иялъухъ, гьез х1алт1изарулел гьанжесел педагогикиял ц1и-ц1иял къаг1идабазухъ балагьидал, занятие бачунелъул цебе лъураб масъала т1убазабизе к1вей к1унгут1иялъухъ балагьун, гьелдаго цадахъ «Хобби-клуб», «Педагогикияб кредоялъул» х1асилалда жюриялъ т1оцебесеб бак1алъе мустах1икъайлъун рик1к1ана Абакарова Марьям, Шотода лъималазул ясли-ах, к1иабилеб бак1алде яч1ана Г1абдурах1манова Булул, Гиничукь росдал ясли-ахалъул тарбияч1ужу, лъабабилеб бак1 бикьана Мирзоева Сакинатида ва Гайдалова Пат1иматида гьоркьоб.

Бергьенлъи босарал тарбиячаг1азе кьуна г1арцулал сайгъатал ва дандрекъон кколел даражаялъул дипломал.

Конкурсалда бергьенлъи босарай Абакарова Марьям Мух1амадовна г1ахьаллъизе йиго республикаялъулаб «Лъаг1алил тарбияч1ужу-2016» конкурсалда.

Нух бит1аги, Марьям. Нижер мурад буго гьенисаги бергьенлъигун мун т1адюссин.

Районалъул лъай кьеялъул отделалъул методикияб централъул специалистаз, конкурсалъул г1ахьалчаг1аз рак1-рак1алъул баркала загьир гьабулеб буго Хунзахъ №3 «Ласточка» ясли-ахалъул коллективалъе ва хасго заведующая Мух1амадова Пат1иматие конкурс т1обит1изе х1ажатабщинаб ч1езабуралъухъ, киналго шарт1ал г1уц1аралъухъ, гьабураб гьоболлъиялъухъ, рак1 разияб х1алт1иялъухъ.

Н. Г1алиева.