Араб г1асруялъул рагъда хадусел соназ маг1рузулаб Дагъистаналъул зах1матчаг1аз байбихьана г1и-боц1и хьихьизелъун г1ат1иракьалде гъутабазде гочине. Гьединан дагь-дагьккун гьенир лъугьана росаби. Цогидал муг1рузул муниципалитетазулг1адинан нилъер районалъулги руго гьенир росаби. Районалдаса т1урал бак1азда рук1аниги нухмалъиялъ х1аракат бахъула гъутанчаг1и рехун теч1ого, цо-цо гьезухъе сапарал гьарун, г1олеб-г1олареб ц1ехон, гьезул т1алаб гьабизе. Гьедин гьал къоязда районалъул нухмалъиялъ иргадулаб сапар бухьана Кизилюрталъул ва Хасавюрт районазул зонабазда ругел гъутабазде. Х1алт1улаб къокъаялда гъорлъ рук1ана районалъул бет1ер Саг1ид Юсупов, заместителал Шамил Г1аммаев ва Асадг1али Г1абдуразакъов, росдал маг1ишаталъул отделалъул х1алт1ухъаби, районалъул СМИязул вакилзаби ва цогидалги.
К1иго къоялъ халат бахъараб х1алт1улаб сапаралъ гъорлъе рачана 7 гъутан. Районалъул т1алъиялъ щибаб гъутаналда хал гьабулеб бук1ана кват1ич1ого т1орит1изе ругел улкаялъул президент вищулел рищиязде х1адурлъи кинан унеб бугебали. Цадахъго щвана фермабаздеги, хал гьабуна кинаб ах1вал-х1алалда г1и-боц1уда хасел т1амизабулеб бугебали.
Т1оцере щвана г1ехьелдерил Ахтини гъутаналде. Гьениб избирательнияб участок рагьун бугоан школалъул минаялда жаниб ва рищиял т1орит1изе киналго шарт1ал г1уц1ун руго. Фермаялда буго 101 х1айван, гьабун буго 45 бече. Росдал маг1ишаталъул бут1аялда гьабураб г1емерсоназулаб рак1бац1ц1адаб зах1маталъухъ х1урматалъул грамотаби кьуна к1иго дояркаялъе. Гьенисан сапар бухьана х1арисезул Баг1араб росу гъутаналде. Гьениб избирательнияб участок г1уц1ун буго культураялъул рокъоб. Ч1езабун буго генератор, принтер, ноутбук ва цогидалги законалъул т1алабзда рекъон рищиял т1орит1улеб минаялъуб рук1ине кколел алатал. Амма жибго культураялъул рукъ жаниб бугеб мина бугоан ц1акъго басралъун, гьениб капиталияб ремонт гьабизе ккани къвариг1унеб буго 5 миллионалдасаги ц1ик1к1ун гъурущ г1арцул. Гьединаб харжги гьабун басрияб мина къач1аялдаса ц1ияб бани лъик1 бук1инилан жиндирго пикру загьир гьабуна Саг1ид Юсуповас. Фермаялда буго кинабниги 200 х1айван, гьабун буго 100 бечеги.
Кидаго цебет1ераблъун рик1к1унеб бук1араб бекьеч1дерил маг1ишаталда цогидазда дандеккун гьанжеги иш квеш гьеч1о. Фермаялда хьихьун буго 300 бет1ер ч1ег1ерх1айваназул. Къинлъизе ругел 200 г1акдал 80 къинлъун буго. Гьоркьохъеб къаг1идаялъ цо сордо-къоялъе х1исаб гьабун беч1ч1улеб буго 800 литра рахьдал, гьелдсан 600 литра бичулеб буго Мах1ачхъалаялъул рахьдал заводалде. Дояркаялъе литраялдаса щолеб буго 3 гъурущ.
Хундерил Самилахъ гъутаналъул фермаялда дагьаб цебег1ан бокьалъул т1охги т1аде т1ун бач1ун хун буго 3 х1айван. Фермаялда буго 480 ч1ег1ерх1айван, гьездсан 280 г1ака ва 110 беч1ч1улеб г1ака. Исана сон байбихьаралдаса гьабун буго 74 бече. Сордо-къоялъ беч1ч1улеб буго 500 литра рахьдал, гьелъул 400 литра кьолеб буго добго гормолзаводалде. Дояркаялъе щибаб рахьдал литраялдаса щолеб буго 2,70 гъурущ.
Г1оч1ло гъутаналдаги избирательнияб участок рагьун буго школалда. Гьениб аск1обго бахъун ч1ун буго 2010 соналъго гьабизе байбихьараб, амма цох1о къадалги рахъун ч1ун хут1араб ц1ияб школалъе бихьизабураб минаги.
Лъаг1илухъ гъутаналда бугеб фермаялда хьихьун буго 64 ч1ег1ерх1айван, гьездасан 43 г1ака, 25 бече. Къойил беч1ч1араб 200 литра рахьдал, 130 литра бичулеб буго.
Сахъадерил гъутаналда чанго соналъ т1адег1анаб даражаялда х1алт1илеб буго ООО «Услуга» абураб маг1ишат. Фермаялда жанире лъугьиндал лъала цогидал гьел къояз ниж щварал маг1ишатазде данде ккун гьениб бугеб рац1ц1а-ракъалъиги х1алт1ул низамги. Гьениб хьихьун буго кинабниги 600 бет1ер г1иял ва 120 бет1ер х1айваназул. Гьарун руго 32 бече ва 200 кьег1ер. Къойил беч1ч1улеб буго 180 литр рахьдал, дояркаялъе литраялдаса щолеб буго 3 гъурущ ва щибаб хъулухъ гьабулеб г1акдахъ 100 гъурущ.
Рехсаралщинал маг1ишатазде щведал дида бич1ч1ана гьезул цонигиязда дояркаялъул зах1маталъул бук1ине кколеб къимат гьабулеб гьеч1еблъи. Г1емерисел маг1ишатазда гьезие щолеб буго беч1ч1араб рахьдал литраялъухъ 3 гъурущ. Моц1рое х1исаб гьабуни гьеб кколеб буго 8-9 азарго гъурущ. Унго гьеб г1арцуда рекъараб гурони къо бихьуларебдайха дояркаялда? Узухъда бихьула, амма гьеб зах1маталъухъ щолел гьел кепкалги райадминистрациялъул рахъалдасан кьолел ч1орогоял грамотабиги гурони дояркабазе т1ок1аб жо щолеб гьеч1о. Гьединаблъун бук1ана районалъул нухмалъиялъ гъутабазде гьабураб иргадулаб сапар.
| 
