29 октябралда районалъул бет1ерасул кабинеталда районалъул нухмалъулесул ишал т1уралев Нурмух1амад Задиевасул нухмалъиялда гъоркь т1обит1ана лъай кьеялъул учреждениял хасалоде х1адурлъиялъул ва налоговияб базаялъул актуализация гьабиялъул бицараб данделъи. Гьелда г1ахьаллъи гьабуна районалъул нухмалъулесул заместителал Асадг1али Г1абдуразакъовас, Шамил Г1аммаевас, райадминистрациялъул цо-цо отделазул нухмалъулез ва цогидалги жавабиял специалистаз.
Лъай кьеялъул г1уц1аби хасалоде х1адурлъиялъул бицунаго, лъай кьеялъул отделалъул начальник Залимхан Г1умаровас баян кьуна 37 лъималазул ахикь щибго г1унгут1и гьеч1ого отопление х1алт1улеб бугин, Г1ахьалч1и гьоркьохъеб школалда хисун бугин мотор ва Буц1ра школалдаги бук1араб г1унгут1и лъуг1изабунилан. Амма ниж Буц1ра школалде к1алъайдал, гьениб жеги г1унгут1и лъаг1изабун батич1о. Нижее бицана котелалъул бух1араб цо бут1а бач1инабизе Москваялде заказ кьун бугин ва анкьидасан пуланаб транспорталъулаб компаниялъ гьеб бач1ине кколилан.
8 ноябралде киналго лъай кьеялъул г1уц1аби х1адурун ругин абураб справка х1адуреян т1адкъай кьуна гьесие районалъул нухмалъулесул ишал т1уралес.
Гьединго данделъиялда рорхана муниципалияб буголъиялъул инвентаризация гьабиялъул, налогал рак1ариялъул, ц1иял асли-ахал рагьиялъул, райсобраниялъул иргадулаб сессиялде х1адуриялъул ва цогидалги суалал.
«Чара гьеч1ого х1ажат буго исана сон лъуг1илалде налоговияб базаялъул актуализация гьабиялъул суал т1убазабизе. Гьелда хадуб щибаб къойил хал кквезе ккола финансовияб отделалъ ва т1асияб соналъул бюджет тасдикъ гьабилелде гьеб т1убазабизеги ккола. Щибаб росулъ ругел х1алт1ухъабиги депутаталги г1ахьал гьарун гьеб иш раг1алде бахъинабе ва щибаб къойил дие х1исабги кье»,-ян лъазабуна Нурмух1амад Задиевас.
«Щивав заместителас жиндирго нухмалъиялда гъоркь ругел отделалгун г1уц1абиги данде гьарун, гьелгун киналго хиса-басиялги х1исабалде росун, бюджеталъул проект х1адуре. Гьебго х1алт1и гьабизе ккола росабазул бегавулзабигунги»,-ян т1адеги жубана гьес.
И. Мух1амадов.
|