Х1ариколо школалдасан харбал
Исанаги, лъималазул ва учительзабазул лъик1аб г1ахьаллъигун т1обит1ана нижер Х1ариколо школалда ихдалилаб спартакиада. Гьенир г1ахьаллъана 1-11 классазул киналниги ц1алдохъаби. Спартакиада рагьана Дагъистаналъул гимн ах1иялдалъун ва байрахъ борхиялдалъун. Г1ахьалчаг1азда гьеб спорталъул праздник баркун ва къецазулъ лъик1ал х1асилал гьарун к1алъай гьабуна школалъул организатор Х. Хваджаевалъ.
Байбихьаралдаса ахиралде щвезег1ан къецал рук1ана х1алуцарал, жиб-жиб классалъул ц1алдохъанас х1аракат бахъулеб бук1ана жиндирго класс цебе бачине ва лъик1ал х1асилал рихьизаризе.
Гьел къецазулъ байбихьун классазда гьоркьоб т1оцебесеб бак1 ккуна 2 аб. классалъул ц1алдохъабаз (классалъул руководитель Х1амзатова З. Б.), 5-8 классазул ц1алдохъабазда гьоркьоб бергьенлъи босана 7 аб. классалъ (классалъул нухмалъулей Мух1амадова П. Д.), 9-11 классалъул ц1алдохъабазда гьоркьоб бергьана 10 класс. Бергьерал классазе ва ц1алдохъабазе кьуна гармотаби ва хьвадулел кубокал.
Къецазул х1асилал данде росидал 1-4 классазда гьоркьоб лъик1аздасан лъик1аллъун рик1к1ана Х1айбулаева П. ва Х1айдаров Х1., 5-8 классазда гьоркьор Мух1амадов М. ва Г1абдулкъадирова Р., 9-11 классазда гьоркьоб Шамхалов М. ва Батирханова П.
Х1анч1азул къо.
Кидаго г1адин исанаги нижер школалда цебеккун лъик1аб х1адурлъиги гьабун умумузул, учительзабазул ва ц1алдохъабазул жигараб г1ахьаллъигун т1обит1ана «Х1анч1азул къоялъул» х1урматалда тадбир.
Гьениб бук1ине бугелъулгун къват1иб ч1ван лъай-хъвай гьабун бук1иналъги батила, ц1акъ г1уц1адго х1аракатаб г1ахьаллъигун ва киназулго махщел бихьуледухъ ана байрам.
Биологиялъул учителас ва жалго лъималаз бицана х1анч1азул х1акъалъулъ, гьезул т1абиг1аталъе ва г1адамасе бук1унеб пайдаялъул, гьездехун бук1ине кколеб бербалагьиялъул. Хасаб жюриялъ щибаб х1алт1уе ва конкурсазе къимат кьуна. Конкурсал рук1ана: бищун лъик1аб х1анч1азул рукъ ва кормушка, бищун лъик1аб сурат (лъималаз рахъарал), бищун лъик1аб газета, бищун лъик1аб стихотворение, бищун лъик1аб т1абиг1аталдасан лъималаз рахъарал фотографиял х1анч1азул.
Киназего ц1акъ бокьана х1анч1азул х1акъалъулъ бихьизабураб кинофильм. Бергьарал лъималазе ва классазе кьуна грамотаби. Ахиралда лъималаз жидерго классрукалгун цадахъ школалъул ахикь рана х1анч1азул рукъзал ва кормушкаби.
Пайдаяб субботник
Учительзабазулги, лъималазулги, цойгидал школалъул х1алт1ухъабазулги цадахъаб х1аракаталдалъун т1обит1ана субботник. Бекьун, г1ери бат1а гьабун, бухъун х1адур гьабуна овощал рекьизе 2 го хур. Гьединго жиб-жиб классазда хадур рухьинарурал гъут1би ва хер бецулел бак1ал рохьун, рухъун, бац1ад гьабун къач1ана. Ц1ияб бак1алдасан лъим бахъиялъе х1алт1аби гьаруна. Лъималазул цо бут1а цадахъ учительзабигун ун рук1ана «Бакъдаса» гъоркье ц1и гьарун ч1варал гъут1бузе хъулухъ гьабизе, муссор бак1аризе.
Гьаниб хас гьабун абизе бокьун буго районалъулго г1адамазда гьариялдалъун. «Бакъда» бугеб как балеб рукъалда сверун ва киса-кибего кидаго батулеб буго чороклъи ва муссор, нижго нечон рук1уна лъималазукьа гьез гьениса бак1арулеб жоялъухъ балагьун. Г1адамасукьа х1инкъич1ониги, Аллагьасукьаг1аги щай х1инкъуларел гьеб рукъалда сверун чороклъи гьабизе.
Нилъер район гурищ рик1к1унеб бищунго бац1ц1адаблъунги, лъик1аблъунги, т1адег1анаб культурияблъунги. Рук1унге цойгидаз раг1и абулеллъун, рук1а кидалго г1адин мисалияллъун.
|