Гьал къоязда районалде рач1ун рук1ана Дагъестан республикаялъул х1исабалъул палатаялъул председателасул заместитель, нилъер ракьцояв Хъазанби Хъазанбиев ва республикаялъул бет1ерасул муг1рузулаб территорияб округалда вугев вакил Абулмуслим Абулмуслимов. Гьез жидерго х1алт1улаб сапар байбихьана районалда К1ахъ-Бакьагьеч1и ва Г1обода Макьаст1а нухлул раг1алда гъут1би ч1еялдасан. Хадуб, районалъул бет1ергун цадахъ гьалбал щвана Х1ариколоса инвалид Г1алибулатова Шуг1айнатихъе. Саг1ид Юсупов дагьаб цебег1ан щун вук1ана Шуг1айнатихъе, гьелъул х1ал-х1укмуги г1олеб-г1олареб рахъги ц1ехон. Цебесеб дандч1ваялда гьелъ районалъул нухмалъулесда гьарун бук1ана инвалидазул коляска босизе кумек гьабеян. Гьеб гьари раг1идал, Хъазанби Хъазанбиевасул х1аракаталдалъун, гьелъие коляскаги кьуна. Гьединго, раг1и кьуна Шуг1айнатие сентябралда санаториялде ине путевка балагьизеги. Гьенисан гьалбадерица сапар бухьана райцентралде. Райадминистрациялда, т1ибит1араб районалъул активалъулгун дандч1вай рагьулаго, Саг1ид Камиловичас баркала кьуна гьалбадерие гьез нилъер районалде кьолеб бугеб к1варалъухъ.
Абулмуслим Абулмуслимовас бицана жакъа республикаялда, хасго муг1рузулал районазда бугеб ах1вал-х1алалъул, гьезда цере ч1арал масъалабазул. Бицана исанасеб сон Дагъистаналда «муг1рузул сонлъун» лъазабун бук1иналда бан, г1иц1го республикаялъул бюджеталдаса муг1рузулал районал церет1еялъе 4,5 миллирд гъурущ биччан бугилан. Лъик1аб къимат кьуна нилъер районалда гьабулеб бугеб х1алт1уеги.
Хъазанби Исх1акъовичас жиндирго к1алъаялда бицана Хунзахъ К1удияб Ват1анияб рагъул г1ахьалчаг1азе бараб памятникалда аск1об парк базе рак1алда бугин жиндаян. Бук1инесеб паркалъул проект бахъизе, гьес цадахъ вачун вач1ун вугоан архитекторги.
Данделъиялдаса хадуб щвана районалъул спортивиял объектазде, разиго хут1ана гьениб х1алт1и г1уц1ун бугеб къаг1идаялдаса.
И. Мух1амадов.
|