Дагьаб цебег1ан Хунзахъ централияб библиотекаялда т1обит1ана Хунзахъ бугеб районазда гьоркьосеб беццазул г1уц1иялъул конференция. Гьелда г1ахьаллъи гьабуна районалъул нухмалъиялъ, беццазул республикаялъулаб г1уц1иялъул председателасул заместитель Хадижат Г1исакъовалъ, пенсионнияб фондалъул, социалияб рахъалъ, халкъ ц1униялъул централъул вакилзабаз рехсолеб г1уц1иял гъорлъе бачунеб лъабабго районалъул канлъукъаз ва цогидазги.
Данделъаразе саламги кьун тадбир рагьана районалъул канлъукъазул обществалъул председатель Камил Жамалудиновас. Жиндирго к1алъаялда гьес бицана араб соналъ жидецаго гьабураб ва хадубккунги гьабулеб бугеб х1алт1ул, бицана пачалихъалъул рахъалдасан щолеб кумек мукъсанаб гурони гьеч1ониги жидеца спонсорал ралагьунги, цогидаб нух батунги, канлъукъазул мурадал ц1унизе ва гьезул т1алаб-агъаз гьабизе бажарараб х1аракат бахъунилан.
Районалъул бет1ер Саг1ид Юсуповас абуна жив х1адурав вугин администрациялъул рахъалдасан канлъулазе к1вараб кумек гьабизеян.
Араб соналъ г1уц1иялъ т1обит1ун буго 6 данделъи, гьениб гьоркьоб лъун буго 42 суал. Бач1ун буго 58 г1арза, гьезул 47ялъе жаваб гьабун буго, 11 бит1ун буго иш т1аде кколел идарабазде. Обществоялъ гъорлъе бачунеб Хунзахъ, Унсоколо ва Хьаргаби районазда учеталда вуго 262 чи, гьезда гьоркьоса 148 чи ккола нилъер районалдаса. 2016 соналда т1обит1ун буго лъабго бат1ияб тадбир. Араб соналъ гьезие бач1ун буго 692000 гъурущ. Социалияб комиссиялъ хал-шал гьабулеб буго кинал шарт1азда канлъукъал г1умру гьабун ругелали ва ресукълъиялда ругезе кумек гьабулеб буго. Гьединго гьеб комиссиялъул инвалидазда гьоркьор рикьулел руго тифлотехникиял т1аг1алаби ва цогидабги къайи-къоно. К1удияб к1вар кьолеб буго инвалидал г1адатал шарт1азда г1умру гьабизе ругьун гьариялдеги. Гъоркьисала гьез г1ахьаллъи гьабун буго республикаялъулаб шашкабазул ва шахматазул чемпионаталда. Социалияб страхованиялъул фондалдасан щун буго анкьго тифлофлэшплеер, 6 тонометр, 9 термометр ва 8 ЭРВУ. Чара гьеч1ого т1уразаризе кколел суалалгун х1алт1ухъаби унел руго лъабабго районалъул администрациязде.
Ахиралда Камил Жамалудиновас абуна гьаб кинабго х1алт1ул гьабун бажаранин районалъул бет1ер Саг1ид Камилевичасул, гьесул заместитель Асадг1али Г1абдуразакъовасул, спорталъул отделалъул начальник Х1айдарбегов Г1абдулкъадирил ва цогидалги жидее кумек гьабулел спонсоразул, активистазул кумекалдалъунилан ва баркала кьуна гьезие. Данделъараз кьуна жидерго суалалги.
И. Мух1амадов
|