13 марталда райцентралда централияб библиотекаялда т1обит1ана Хунзахъ бугеб районазда гьоркьосеб беццазул г1уц1иялъул данделъи. Гьениб г1ахьаллъи гьабуна районалъул бет1ерасул заместитель Х1амид Гьит1иновас, беццазул республикаялъулаб г1уц1иялъул вакилзабаз, Хунзахъ бугеб г1уц1иялъ гъорлъе бачунеб лъабабго районалъул канлъукъаз ва цогидазги.
Данделъаразе саламги кьун тадбир рагьана Хунзахъ бугеб районазда гьоркьосеб обществоялъул председатель Камил Жамалудиновас. Жиндирго к1алъаялда гьес бицана араб соналъ гьабураб ва исана гьабизе рак1алда бугеб х1алт1ул.
Араб соналъ г1уц1иялъ т1обит1ун буго 6 данделъи, гьениб гьоркьоб лъун буго 56 суал. Бач1ун буго 58 г1арза, гьезул 25ялъе гьабун буго жаваб, 22 бит1ун буго иш т1аде кколел идарабазде, учеталде босун буго-18. Х1исаб кьолеб заманалда жаниб т1обит1ун буго 3 тадбир, гьезда гьоркьоса 1 реабилитационнияб, 1 маданияб, 1 спорталъулгун сах гьариялъулаб. Администрациязулгун учреждениязул нухмалъулелгун т1орит1ун руго 7 дандч1вай. 2017 соналда г1уц1иялъе бач1ун буго 26760 гъурущ, гьелдасан Хунзахъ районалъул администрациялдасан-10000 гъ., Хьаргаби районалъул т1алъиялдасан-15000, членазул взносал-1760 гъ. Обществоялъ гъорлъе рачунел Хунзахъ, Унсоколо ва Хьаргаби районазда учеталда вуго 251 канлъукъав чи, гьезда гьоркьоса 139 чи ккола нилъер районалдаса. Социалияб страхованиялъул фондалдасан щун буго 3 тонометр, 2 термометр, 37 РВУ, 20 саг1ат, 20 г1анса ва цогидалги канлъукъал г1адамазе х1ажалъулел алатал. К1удияб к1вар кьолеб буго инвалидал г1адатал шарт1азда г1умру гьабизе ругьун гьариялдеги. Гъоркьисала гьез г1ахьаллъи гьабун буго Г1ахьвахъ районалда т1обит1араб спорталъул тадбиралда, гьединго шахматазул, шашкабазул ва доминоялъул рахъалъ республикаялъулал турнираздаги. Чара гьеч1ого т1уразаризе кколел суалалгун обществоялъул х1алт1ухъаби унел руго лъабабго районалъул администрациязде.
Беццазул республикаялъулаб обществоялъул член, Кизилюрталъул беццазул обществоялъул председатель, нилъер ракьцояв Г1абдулаев Ах1мадица бицана ц1акъго мукъсанаб гурони г1арцулаб кумек гьеч1ониги г1уц1иялъ бажарараб х1алт1и гьабулеб бугилан. Гьединго гьес абуна районалъул нухмалъиялдасан кумек дагьаб ц1ик1к1инабизе ккелин ва цох1о администрациялда божун ч1еч1ого ресалда ругел г1адамазда гьарун, спонсорал ралагьун ч1аголъи гьабизе ккелилан.
Ахиралда Камил Жамалудиновас баркала кьуна жидее кумек гьабурал районалъул нухмалъиялъе, спорталъул отделалъул начальник Х1айдарбегов Г1абдукъадирие, киналго активистазе. Данделъараз кьуна жидерго суалалги.
И. Мух1амадов
|