Дагьал церег1ан къояз Гьоц1алъ культураялъул рокъоб, гьоц1дерил устарзабиги, школлъималги, т1аде рач1арал гьалбалги г1ахьаллъун т1обит1ана «Гьоц1дерил устарзабазул ирсилал» абураб ц1аралда гъоркь данделъи. Гьеб данделъиялда г1ахьаллъизе вач1ун вук1ана Хунзахъ муниципалияб районалъул бет1ер Юсупов Саг1ид, гьесул заместитель Асадг1али Г1абдуразакъов, районалъул культураялъул отделалъул начальник Ирайгьанат Мух1амадова ва цогидалги учреждениязул, организациязул нухмалъулел.

Гьеб данделъи т1обит1иялъе г1илла бук1ана цебе дунялалда ц1ар раг1араб Гьоц1алъ художественнияб комбинат жакъа къоялъги х1алт1улеб гьеч1олъи, гьениб къебеллъиялда куцарал, махщел т1ок1ал, кверал меседилал устарзабаз маг1ишат гьабизелъун цогидал х1алт1аби гьарун, гьеб махщалил ицц къине тун бук1ин. Гьоц1дерил т1аг1алабазул комбинат Советияб заманалда Дагъистаналда ва улка тун къват1ибехун лъалаан гьенир гьарурал т1аг1алабаздалъун. Гьенир гьарурал т1аг1алаби ц1унун руго Эрмитажалда, къват1исел улкабазул музеязда, Брюсселалъул, Монреалалъул, Осакаялъул выставкабазда. Киса-кибего гьезул х1алт1абазе кьун буго т1адег1анаб къимат. Араб г1асруялъул 90 соназ зах1матаб ах1вал-х1ал бук1иналда бан, гьениб ч1езе тезе ккана комбинаталъул х1алт1и. Гьебги бич1ч1ун 2013 соналъ халкъиял махщелазул выставкаялда ДРялъул президент Рамазан Г1абдулат1иповас Культураялъул министралда т1адкъана Кубачи, Гьоц1алъ, Унсоколо росабазе школазда махщелчилъиялъул аслуял малъизе х1алт1и гьабизе ва гьелъие г1арцулал сурсаталги ралагьизе. Жакъа къоялъги гьеб х1алт1и ч1ун бук1инги бихьун, гьоц1дерил жамаг1аталъ районалъул бет1ер Саг1ид Камильевич Юсуповасул кумекалдалъун гьеб киназдаго к1очон тараб к1вар бугеб суалалда сверухъ багъа-бачари гьабизе байбихьана. Гьелъие байбихьиги гьеб данделъиялдасан байбихьана. Данделъи байбихьаралдаса ахиралде щвезег1ан берцинго, махщалида нухда бачарал Гьоц1алъ культураялъул рукъалъул директор Малагьит1инова Г1унайзатица ва Гьит1инаб Гьоц1алъ росдал клубалъул директор Мух1амадова Мадинаца бицана цох1о г1арцул т1аг1алабазул устарзаби гурелги  Гьоц1алъ ц1ар раг1арал пахьул, маххул, ц1улал, хьитазул ва къадал х1алт1абазул устарзабиги рук1иналъул, Гьоц1алъ Дагъистаналдаго 300-350-ялдаса ц1ик1к1ун соназ цебе устарзабазул росу бук1ин загьирлъун бук1иналъул, гьеб заманаялъ г1арцул устарлъиялъе байбихьарав чиги Гъазиев Г1алибег кколевлъиялъул.

Цебераг1иялдаса хадуб ясаз к1алъазе раг1и кьуна 1990 соналдаса комбинаталъе нухмалъи гьабурав Дагъистаналъул искусствоялъул мустах1икъав х1алт1ухъан, Художниказул Союзалъул член, Дагъистаналъул ва Россиялъул бат1и-бат1иял выставкабазул г1ахьалчи Мух1амадг1алиев Сайгидах1мадие. Сайгидах1мадица бицана дол зах1матал 90 соназ х1алт1и гьабизе сурсатал, г1арац гьеч1олъиялъ зах1малъи бук1иналъул, дагь-дагьккун комбинат биххиялъул, х1алт1иги гьеч1ого г1емерисел росуцоял хут1иялъул, гьанже г1агараб росдал комбинат бахъинабизе, гьеб махщалиде лъимал куцаялъе х1алт1и гьабизе ккеялъул. Гьелдаса хадув к1алъазе вахъарав жакъа комбинаталъе нухмалъи гьабулев вугев Гьиматов Гьиматица г1одорч1арал школлъималазде хит1аб гьабуна г1агараб росдал ц1арги, ц1ар раг1арал т1аг1алабазул устарзабазул махщелги камил гьабиялда т1ад х1алт1изе ккеялъул. Лъик1аб заманги бач1ун ц1идасан Гьоц1алъ цебе бук1арабго г1адин художественнияб комбинат х1алт1изе бук1иналдаги божилъи гьабуна гьес.

Хадуб к1алъазе раг1и босарав Хунзахъ муниципалияб г1уц1иялъул бет1ер Юсупов Саг1ид Камильевичас г1одорч1аразда бич1ч1изе гьабуна халкъиял промыслазул бугеб к1варалъул. Гьес районалъул лъай кьеялъул отделалъул начальник Г1умаров  Залимханида т1адкъана Гьоц1алъ гьоркьохъеб школалда махщелчилъиялъул дарс лъималазе кьолеб къаг1ида г1уц1ун, мурадалде щвараб х1алт1и гьабизе.

Махщел бугесул киналъего гьунар бук1унилан абухъего, данделъиялъул ахиралда гьоц1дерил кьурдухъабаз г1одорч1аразда бихьизабуна умумулъанго кьурдизеги кеч1 ах1изеги гьезул бергьун к1удияб махщел бук1ин.

Рук1ана гьениб гьединго росдал ц1и вищарав бет1ер Хъазанбиев Ах1мадида хъулухъ баркиги, берцинаб, бечедаб тепсиялъул стол къач1арал культураялъул ва библиотекаялъул ясазе т1аде рач1араз кьолеб баркалаги, къун унеб бугеб махщалил т1аг1алабазул выставкаги.

У. Къурамух1амадова.