Божизеги захIматаб, божаниги ракIалъ къабул гьабизеги бокьулареб хIакъикъатлъун лъугьана гьайбатал къасдалги, мисал босизе рекъарал ишалги гьанирго тун, араб анкьалда ГьитIинов МухIудадаца абадияб рокъобе сапар бухьин. 26 маялъ къокъидго чIвараб захIматаб унтул квачIикьа ворчIизе кIвечIо гьев мунагьал чурадида. ЛъикIав инсан, жигарав жамгIияв хIаракатчи, гьунар бугев гIуцIарухъан, гIемерал соназ батIи-батIиял жавабиял хъулухъазда хIалтIарав ва тIолабго гIумру гIагараб районалъе пайдаялъе буссинабурав ГьитIинов МухIудада ТIалхIатовичасул хвел бакIаб камилъун лъугьана районалъего.

МухIудада ТIалхIатович гьавуна 1946 соналъул 7 октябралъ Хунзахъ росулъ. 1965 соналда гьес лъугIизабуна росдал гьоркьохъеб школа. 1967-1971 соназда инженер-механикасул махщалие цIалана Орджоникидзе шагьаралда росдал магIишаталъул институталда. Гьениса тIад вуссиндал гIолохъанав специалист хIалтIана районазда гьоркьосев сельхоз-техниклъун. Гьенив хIалтIулаго МухIудада ТIалхIатович ахIула армиялде. ВатIаналда цебе тIадаб налъиги тIубан тIад вуссаралдаса ГьитIиновасул захIматалъулаб гIумру бухьараб буго партиялъулгун комсомолалъул хIалтIуда. Щуго соналъ гьабуна гьес районалъул комсомолалъул гIуцIиялъе нухмалъи. Гьел соназда жаниб МухIудадал хIаракаталдалъун районалда гIуцIана вокалиябгун-инструменталияб ансамбль ва комсомолалъул активалъул Кьили магIарле поход.1978-1990 соназ парткомлъун вукIана Хунзахъ Хизроевасул цIаралда бугеб колхозалда. 2000-2012 соназ хIалтIана районалъул нухазул участкаялъул начальниклъун. Гьел соназда гьесул нухмалъиялда гъоркь гIемераб хIалтIи гьабуна районалъул нухазул даража борхизабизе, 47 километралъул манзилалда нухазде тIуна хъил. 2005 соналъ МухIудадал захIмат кIодо гьабуна «Дагъистан республикаялъул нухазул магIишаталъул мустахIикъав хIалтIухъан» абураб хIурматияб цIаралдалъун. Пенсиялде ун хадувги ахирисеб къоялде щвезегIан жамгIияб хъулухъ хIисабалда директорлъи гьабуна Хунзахъ бугеб рагъулабгун-патриотикияб «ХIажимурад» клубалъе. Районалде рачIаралщинал гьалбал, тарих бокьулел гъираялда къабул гьарулаан «МухIудадал» фонтаналда клубалъул гIахьалчагIаз.

КIочонареб, наслабаз мисал босизе мустахIикъаб лъалкI тана гьес ракьалда хадур гIолезе. Щиб хъулухъ тIад къаниги МухIудадаца живго вихьизавуна хIалтIудехун жавабчилъи цIикIкIарав ва бажари бугев нухмалъулевлъун. Гьесул гIумруялда кIудияб бакI ккуна жамгIияб хIаракатчилъиялъ. Районалда кинаб тадбир тIобитIулеб бугониги, щиб хIажалъаниги кумекалъе ватулаан гьев. ГьитIиновасул хIаракаталдалъун гIуцIун рукIана 1989 соналъ Хунзахъ росдал 2400 сон тIубаялъул, 2000 соналъ районалъ 70 сон тIубаялъул ва 2001 соналъ Хизроевасул цIаралда бугеб колхозалъул юбилеял. Районцоязда жеги ракIалдаса ун батиларо араб соналъ МухIудадал нухмалъиялда гъоркь тIадегIанаб даражаялда тIобитIараб наиб ХIажимурад гьавуралдаса 200 сон тIубаялъул юбилейги. М. ГьитIинов вукIана районалъулго патриот, жамгIияв хIаракатчи, бажари бугев гIуцIарухъан, лъикIав насихIатчи ва росуцояв. Гьединавлъун хутIила МухIудада гIага-божаразулги гьудул-гьалмагъзабазулги, цадахъ хIалтIаразулги ракIазулъ жеги гIемерал соназ. Аллагьас мунагьал чурун ратаги гьесул. Эбел ПатIиматида, хъизан Сиядатида, васазда ва тIолабго гIагарлъиялда гъваридаб пашманлъиялъул зигарагун

Райадминистрация,

Хунзахъ росдал жамагIат,

Цадахъ хIалтIарал ва гьудул-гьалмагълъи.

«Росдал захIматчи» газеталъул коллектив.