Дун г1емер дандч1вала росабазул яги районазул нухмалъулелгун. Руго гьел унго-унгояб куцалъ рух1ги жанги кьун х1алт1и гьабулелги, руго цох1о харж боси гурони т1аса-масаго х1алт1улелги. Руго ч1ух1аралги пахруялги. Руго жидехъе рач1аразул мурад т1убазе х1алт1улелги. Дие гьаб макъалаялда бицен гьабизе бокьун буго хъулухъалъ т1адег1анав вугилан жиндилъ кинабг1аги ч1ух1и гьеч1ев, рак1бац1ц1адго т1адаб х1алт1иги гьабулев, киндай жиндихъа инсанасе лъик1лъи гьабун бажарилаян ургъулев вук1унев, жакъа 50 сонил ригьалдеги вахунев, гьездаса 25 соналъ ц1ех-рехалъул ва прокурорасул х1алт1уда т1амурав Хунзахъ районалъул прокурор, юстициялъул к1удияв советник Г1умаров Рамазанил. Дида Г1умаров лъалаан Шамил районалда прокурорлъун х1алт1улел 2006-2015 соназги. Амма жакъа г1адин гьесулгун гара-ч1вариялде дун ккун вук1инч1о. Хунзахъ гьесул кабинеталде щведал, Рамазан цевегосев гьудул-гьалмагъ вихьарав г1адин рази-ракиго дандч1вана ва секретаршаялда чай лъеянги абун диргун хабаралде жувана.

-Рамазан, гьаб хъулухъалде щвезег1ан кинаб къимат дур бук1араб?

- Дун гьавуна гьит1инабго Ч1арада районалъул Цемер росулъ. Дир эмен вук1ана вехь ва кинабг1аги дие гьесул кумекги бук1инищха. 1989 соналъ Советияб Армиялда хъулухъ гьабун хадув дун ц1ализе лъугьана Волгоградалъул т1адег1анаб ц1ех-рехалъул школалде.

Гьеб лъуг1ун хадув 1993-98 соназ х1алт1ана Гъизилюрт шагьаралда следовательлъун, 1998-2006 соназ Гъизилюрталъул районазда гьоркьосеб прокуратураялда следовательлъун, к1удияв следовательлъун, прокурорасул заместительлъун.

-Гьаб махщел т1аса бищизе щиб г1илла ккараб?

-Дие гьит1инго бокьулаан ц1ех-рехалда хурхарал т1ахьал ц1ализе, бокьулаан кивго рит1ухъавлъун вук1ине. Гьелъги батила.

-Прокурорасул х1алт1и буго гъваридго лъугьараб такъсиралда гъорлъе ваккизе ккарабги, гьадинго такъсир гьукъиялъе бич1ч1и кьеялъул х1алт1и гьабизе ккарабги, терроризм ва экстремизм гьукъизе кколебги.

-Аслияб х1алт1и дица рик1к1уна дир жавабчилъиялда бугеб бак1алда г1адлу-низамги бук1ин ва дуца абухъе терроризмагин экстремизмаги гьукъи. Бит1араб буго, т1оцебе рокъоб эбел-инсуца, хадуб школалда, ц1алул заведениязда бит1араб тарбия кьей буго к1вар бугеб иш. Гьелде ц1ик1к1ун к1варги кьезе ккола. Балагье жакъа нилъер республикаялда чанго ч1ах1иял х1акимзаби ккун ана, чангоял х1алт1удаса эркен гьаруна. Гьелъие г1илла щиб? Хъант1и, законалъ бихьизабураб нухдаса кьури. Щиб х1ажат бугеб инсанасе г1ураб харжги бугони, рет1ине-квинеги бугони, цойги х1ажаталъеги бугони. Лъида берцин рихьизе ч1ах1и-ч1ах1иял хъулби ралел ругел? Бац1адаб харжалъухъ гьединал минаби ралищ? Киданиги раларо. Цох1о законалъ гуребги Аллагьасги гьукъараб гьеч1ищ гьединаб пасалъи.

Нилъер улкаялдаго т1ибит1ун буго коррупция. Гьелде данде г1емераб х1алт1иги гьабулеб буго. Батизе бегьула закон дагьаб тамахаб бук1унги. Китаялда коррупционеразе ч1вазе къот1ула. Г1арабазул х1укуматалда цин квер къот1ула, хадуб к1иабилеб квер, гьелдаги ч1еч1они бет1ер къот1ула. Рак1алда буго Халкъияб Собраниялда гьеб суал борхараб мехалъ, мунагьал чураяв Суракъатица абуна цо теч1ого чиновник кверал къот1арав вук1инин нилъер гьаниван.

-Советияб заманалде данде ккун щиб бат1алъи бугеб жакъа прокурорасул х1алт1ул?

- Гьаб заманалъ ц1ик1к1ун руго хъулухъалъулал (должностниял) нарушениял. Гьединго к1вар кьолеб буго предпринимателазул х1алт1уде гьезде х1ажат гьеч1ел хал гьабиял гьарич1ого тезе гьединго криминалиял лъугьа-бахъинал гьукъизеги. Ахирисезул география ц1ехани гьел ц1ик1к1ун шагьаралда рук1уна. Кин бугониги къо анаг1ан гьеб рахъ улкаялдаги, Дагъистаналдаги лъик1лъулеб буго, гьеб ккола гьабулеб х1алт1ул х1асил бук1ин. Квешаб пишаялда вугев чиясул ахирги квешаб бук1уна.

-Дуцаго инсанасулъ кинал хасиятал лъик1ал ва квешал ругилан абулел?

- Инсанасул лъик1аб хасият буго профессионализм, рит1ухълъи, рак1бац1алъи, бегьулеб лъик1лъи инсанасе гьаби. Дие рихараб буго х1алихьалъи, гьереси бицин, мац1 гьаби.

Хунзахъ ругищ дур х1алт1уе квал-квалал гьарулел чаг1и?

-Гьеч1о. Хунз руго дунги вич1ч1улел, дидаги рич1ч1улел г1адамал.

Гара-ч1вариялда Рамазан кинго разилъич1о жиндирго х1алт1ул бицине. Гьелъги бицунеб бук1ана гьев рецц-бакъ х1ажатав яги гьеб бокьулев чи гуревлъи.

Бокьун буго Рамазанида юбилейги баркулаго гьесие х1алт1улъ икъбал-талих1ги, щулияб сахлъиги, рохелги гьаризе.

Сайпула Гьит1инамух1амадов

Мух1амад Насрулаев.