Квешал лъугьа-бахъиназул гурони раг1улареб заманалда, ц1акъ бокьула ц1ияб, лъик1аб хабар лъазе. Ракьцоязул бергьенлъабаздаса рохула киналго.
Ц1ияб соналда цересел къояз редакциялде вач1ана Т1ануси росулъа спортсмен 9 классалъул ц1алдохъан Г1алиханов Шамил.
Исана г1агараб росдал школалде ц1ализе вач1инег1ан, Шамилица г1умру гьабулеб бук1ана Мах1ачхъала шагьаралда. Гьенисан т1амуна гьес спорталде т1оцебебсеб галиги. Т1оцебесеб классалде вачарав гьит1ич ц1алуда цадахъго хьвадана журарал рагъулал искусстваби лъазаризе. Къойидаса къойиде Шамилил спорталде бугеб рокьи ц1ик1к1ана. Т1адч1ун гьабураб х1алт1ул х1асил ккеч1ого хут1уларо. Т1аса бищараб спорталъул тайпаялде бугеб рокьиялъги ц1ик1к1араб жавабчилъиялъги Шамил лъабц1уса вахъана Дагъистаналъул чемпионлъун. Бергьенлъабазухъ гьит1инав спортсмен мустах1икълъана лъабго кубокалъе, 14 медалалъе ва г1емерал дипломазегун грамотабазе. Шамилил шапакъатазухъ ралагьидал бихьула гьес бергьенлъи босич1еб сон къанаг1атги гьеч1олъи. Гьит1инав спортсменасул копилкаялда руго исана комбат самооборонаялъул ДРялъул первенствалда Дунялалъул чемпион Ю. Х1усенов рак1алде щвеялъул ММАялъул Дагъистаналъул къецазда (2014 с.) ва исана ПРБ FCF ММАялъул полноконтактнияб рукопашнияб рагъухъ щварал кубокал, 7 диплом, 8 грамота. Шапакъатал Шамилие щун руго ММАялъул, комбат самооборонаялъул, кик-боксингалъул, КУДОялъул къецазда росарал бергьенлъабазухъ.
Лъималазул церет1еял рарал рук1уна тренерасул махщалида. Мах1ачхъалаялда Шамилил тренерлъун вук1ана Х1ажибеков Х1айбула. Т1анусиве ц1ализе вит1аниги, спорт рехун теч1о Шамилица. Журарал рагъулал искусствабазе районалда ругьун гьарулел бак1ал гьеч1ониги, бугелдаса пайда босун, спортсмен хьвадулев вуго Мух1амадов Мух1амад Пирбудагъовичасде цеве гугариялде.
Жиндаго лъураб, Афганистаналда рагъул майданалда рух1 кьурав багьадур Г1алиханов Шамилил ц1ар, дагьал соназухъ балагьич1ого, къадруялда борхатго ккун буго Шамилица. Дагъистан тун къват1ибги машгьурал Шагьрудин Шамхаловасул, Мух1у ва Шамил Г1алиевазул ва цогидазулги гьит1инав росуцояс хадубккунги ч1ах1иял бергьенлъабаздалъун, лъик1ал ишаздалъун раг1изабеги нилъер районалъул ц1ар дунялалда. К1удияв умумузул мустах1икъав ирсилавлъун вахъаги Шамил.
П. Гунашева.
|