Щибаб соналъул ноябралъул ахирисеб гьат1ан къоялъ киса-кибего улкаялдаго г1адин нилъер районалдаги к1одо гьабула эбелалъул къо.

Эбел, гьеб раг1ул хинлъиги, хиралъиги, х1айранлъиги, х1еренлъиги, недегьлъиги лъаларев, бич1ч1уларев инсан вижулев ватиларо ракьалда. Лъималазул рохел-эбелалъул рохел, лъималазул пашманлъи-эбелалъул рах1атхвей. Эбел ккола рукъалъул гъанситохъ ц1а ц1унулейги, лъик1аб тарбия кьун нилъер обществоялъул бук1инесеб г1ел-лъимал г1езарулейги, гьел г1адамалъе рахъинарулейги г1адан. Гьеле гьей эбел к1одо гьаюн гьал г1агарал къоязда Г1арани библитекаялъул минаялда т1обит1ана рохалилаб тадбир.

Т1аде ах1арал гьалбадерида, гьел гьоркьор ккун киналго руччабазда баркиялъул к1алъайги гьабун гьеб мажлис рагьана Ц1ада бибилотекаялъул заведующая Г1алибегова Анисатица. Хадур цере рахъарал Г1арани гьоркьохъел школазул 8-абилел классазул ц1алдохъабаз рик1к1ана эбелалъул хиралъиялде, борхалъиялде, берцинлъиялде гьарурал куч1дул.

Улбузда эбелалъул гьайбатаб байрам баркизе дандеруссиналде рач1ун рук1ана райадминистрациялъул бет1ерасул заместитель Г1аммаев Шамил, райадминистрациялъул юрист Г1абдулаев Х1асан, Хунзахъ муниципалияб г1уц1иялъул бет1ерасул заместитель Абух1ов Къурамух1амад, районалъул культураялъул отделалъул начальник Мух1амадова Ирайгьанат, Ц1адаса Х1амзатил музеялъул директор Патах1ова Г1айшат ва цогидалги районалъул учрежденияздаса, организацияздаса вакилзаби.

Улбузда районалъул т1олалго бихьиназул, муниципалияб районалъул бет1ер Юсупов Саг1ид Камильевичасул рахъалдасан баркиялъул раг1аби абизе вахъана Г1аммаев Шамил, улбузе, руччабазе къимат кьураб к1алъай гьабуна Г1абдулаев Х1асаница ва Къурамух1амад Абух1овас.

К1алъазе рахъарал Хунзахъ муниципалияб г1уц1иялъул бет1ерасул кумекчи Мух1амадов Мух1амадица, Г1арани школа-интернаталъул завуч Сайгидх1осен Г1алибеговас цойги нухалъ тасдикъ гьабуна эбелалъул къо к1одо гьаби-гьеб руччабазде, эбелалде бугеб гъваридаб рокьиялъе нуг1лъун кколеблъи, эбелалде щолеб жо щибго дунялалда гьеч1олъи, эбелалдаса гьуинабги, хинабги, гьайбатабги раг1и гьеч1олъи, эбелалда бараб бук1унеблъи хъизаналъул рек1ел парахалъи, рекъел, талих1, г1умрудул даража, нилъер цебет1ей.

Улбузул рахъалдасан к1алъарал Ц1адаса Патах1ова Г1айшатица, Г1арани ФАПалъул заведующая Мансурова Пат1иматица ва цогидазги рак1-рак1алъулаб баркала кьуна жидее рохалилаб тадир г1уц1арал Ц1ада ва Г1арани библиотекабазул х1алт1ухъабазе, районалъул отделалъул ва библиотекаялъул, культураялъул нухмалъиялъе. Гьарана гьезие сахлъи ва хадубккунги гьединал тадбирал т1орит1изе жигарчилъиги, махщелги, бажариги. Улбузе аваданлъи, ихтилат-кеп гьабун цее яхъана районалъул искусствоялъул школалъул преподаватель, ДРялъул хакъияй артистка Умакусум Мух1амадова.

У. Къурамух1амадова.