23 марталда 4 сон т1убала машгьурав г1алимчи, жиндир мунагьал чураяв Бакълъухъа Г1абдулгъапурил Мух1амад исламалъул тушбабазул бидулаб квералдасан къадаралде щваралдаса. Гьелда хурхун Хунзахъ клубалда т1обит1ана г1алимчи рак1алде щвезавиялъул мажлис. Гьениб г1ахьаллъи гьабуна Хунзахъ ва районалъулго росабазул жамаг1атаз, диниял идарабазул вакилзабаз.
Мажлис рагьана ва ахиралде щвезег1ан гьеб нухда бачана Хунзахъ росдал дибир Мух1амад-х1ажи Мух1амадовас. Бакълъухъ росдал дибир Мух1амадрасул-х1ажица г1ат1идго бицана Г1абдулгъапурил Мух1амадил г1умруялъул х1акъалъулъ, рехсана дол зах1матал бикъа-хъами, хъах1балъиги, ц1огьги, хъачагълъиги ц1ик1к1арал 90-лел соназ дин цебет1еялъе гьес бахъараб х1аракаталъул ва гьесул бук1араб берцинаб, цогидаз мисал босизе рекъараб берцинаб т1абиг1аталъул. Хунзахъ бугеб мадрасаялъул директор Эльдарил Мух1амадица жиндирго к1алъаялда бицана нилъ киназго раг1абаздалъун гуребги, г1амалалдалъунги гьединал Аллагьасул диналъухъ рух1 кьурал бах1арзазул нух кквезе ккелилан. Цебе дин гьукъараб заманалдацин, нилъер умумуз гьедин рак1 унтун т1алаб гьабураб г1елму, жакъа г1адинаб диналъе киналго нухал рагьараб заманалда к1вар гьеч1ого тезе бегьулариланги абуна гьес. Гьединго Г1абдугъапурил Мух1амадил рехсей гьабурал к1алъаял рук1ана Дагъистан республикаялъул муфтияталъул муг1рузулаб террирориалияб округалда вугев вакил Х1асан-х1ажи Мух1амадовасул, Хьаргаби районалъул имам Мух1амадсайпула Ах1маевасул, рихьундерил дибир Г1алих1ажи Садрудиновасул ва цогидазулги. Мажлис берцин гьабун бук1ана, к1алъаязда гьоркьоб берцинаб гьаркьидалъун ах1улел мавлидазги. Ахиралда дуг1аги гьабун, хундерил дибир Мух1амад-х1ажица баркала кьуна ах1и басра гьабич1ого, ваг1за-хабар гьабизе рач1арал г1алимзабазеги ва мажлисалда г1ахьаллъи гьабураб жамаг1аталъеги.
Мажлис ана пайдаяб ах1вал-х1алалда.
И. Мух1амадов.
|