2016 соналъ районалъул жанисел ишазул отделалъул ва гьелъул киналго г1уц1абазул х1аракат буссинабун бук1ана такъсирал дагь гьариялде, районалда парахалъи, г1одобе биччай бук1инабиялде, жамаг1аталъе х1инкъи бугел ишал гьукъиялде.

Райотделалъул нухмалъиялда бажарана киналго подразделениязда гьоркьоб бухьен, цоцазе кумек ва цадахъ рекъон х1алт1и г1уц1изе, т1олабго х1алт1ул качество цо къадаралъ борхизабизе.

Районалда халкъ буго законалъухъ г1енеккараб, сабруяб, г1одобе биччараб г1амал-хасияталъул, хьвада-ч1вадиялъул г1адамал. Цо-цо цогидал бак1азда г1адин, районалъул г1адамазулъ гьеч1о полициялъул х1алт1ухъабаздехун ццин, рокьукълъи, питначилъиялде гьет1араб г1амал.

Рищиял, байрамал, спортивиялгун культуриял ва цогидалги г1емерал г1адамал данделъарал тадбирал, дандеруссинал уна г1уц1адго ва г1одобе биччараб ах1вал-х1алалда. Гьай-гьай, г1уц1адго гьединал тадбирал т1орит1иялъулъ хасаб бак1 ккола полициялъ.

-2016 соналъ районалда хъвай-хъваг1ай гьабун буго 82 такъсиралъул. Гьездасан рагьун буго 70 такъсир. Гьеб ккола 89 процент. Гьединго хъвай-хъваг1ай гьабун буго ва ц1акъго зах1матаб 27 такъсиралъул. Гьездасан рагьун буго 17 такъсир.

Араб соналъ хъвай-хъваг1ай гьабун буго 19 экономикияб такъсиралъул, абизе ккола гьеб такъсир араб соналъул гьебго заманалде данде ккун к1иго нухалъ ц1ик1к1ун бугилан. Гьединго ц1ик1к1ун руго ихтияр гьеч1ого рокъоб ярагъ гьабиялъул ва ц1униялъул, террористазул къукъабазде гъорлъе лъугьиналъул х1ужжаби. Цебесеб соналде данде ккун дагьлъун буго ц1огь, хъамалчилъи.

Аслияб къаг1идаялъ такъсирал гьарун руго районалъул 11 росулъ. Гьелги ккола Хунзахъ, Бакьагьеч1и, Гьамущи, Т1ануси, Г1орот1а, Гьоц1алъ, Г1ахьалч1и, Хьини, Г1арани, Заг1иб, Шотода, Харахьи росаби.

Наркотиказда хурхарал такъсирал 2016 соналъ гьарун руго 8, киг1ан г1ажаиблъи гьабизе ккараб х1ужжа бук1аниги, гьел такъсирал гьарулел руго ч1ах1ияб г1елалъул г1адамаз.

Цересел соназде данде ккун 2016 соналъ ц1ик1к1ана нилъер районалда КТО лъазаби. Гьедин 2016 соналъул 11 марталда Болъихъ ва Хунзахъ районазул г1орхъода т1обит1араб гьединаб операциялъул х1асилалда ч1вана 2 хъачагъ.

Гьединго 2016 соналъул 30 июлалде щвезег1ан Хунзахъ, Шамил ва Гъуниб районазул жанисел ишазул отделазул х1алт1ухъабиги г1ахьал гьарун, ДР-ялъул ФСБ-ялъул ва МВД-ялъул х1алт1ухъабигун цадахъ Шамил районалъул Т1елекь росдада сверухълъиялда т1обит1ана такъсирчаг1и, яргъид г1уц1арал хъачагъал ралагьиялъул операция. Гьезухъа бахъана 2 автомат ва рагъулал сурсатал. Гьединго 12, 18, ва 23 марталда гьабураб ц1ех-рехалъул х1асилалда батана хъачагъаз жаниб яшав гьабулеб бук1араб блиндаж. Гьениса нахъе босана такъсирчаг1азул патронал, медикаментал, топографиялъул карта, кванил ниг1матал, ц1а-раг1, 820 патрон, амиакалъул селитраялъул 170 кг. Гьединго 9 июлалда Заг1иб росдадаса 3 километралъ рик1к1ад бугеб фермаялда батана 5,45 калибралъул 27 патрон. 24 августалда Гьит1инаб Гьоц1алъ росдада аск1об балъгояб рокъоб батана 5,45 калибралъул 42 патрон, 7,62 колибралъул 5 патрон, запалгун цадахъ цо РГО граната, кванил ниг1матал, хасаб рет1ел-хьит.

2016 соналъул 12 моц1ида жаниб ихтияр гьеч1ого ярагъ ц1унун ва х1алт1изабулеб батун хъвай-хъваг1ай гьабуна 24 такъсиралъул. Гьединго ярагъ х1алт1изабун районалда ккана 2 такъсирияб иш. Районалъул жанисел ишазул отделалъ гьабураб профилактикияб х1алт1ул х1асилалда цо-цо зах1матчаг1аз, районцояз полициялде кьуна жидерго рокъоб ц1унун бук1араб ярагъ. 19 октябралда Хунзахъ росулъа Мух1амадов Г1алица полициялде лъазабуна гьесул к1удияв инсул гьороб гулла-хералъул сурсатал ратанилан. Гьединго районалда «ярагъ» операция т1обит1улаго жанисел ишазул отделалъ т1атинабуна ихтияр гьеч1ого рокъоб 6 туманк1 ц1унун бук1ин. Гьеб бет1ергьабазухъа нахъе босана.

Араб соналда цо къадаралъул х1алт1и гьабуна наркотикал х1алт1изабулел, гьел г1езарулел г1адамазда сверухъги. Г1адамазухъа бахъана 74,28 грамм Марихуанаялъул, 126 хъарахъ габанидул, гьединго г1алхуда г1езабулеб батун т1аг1инабуна 850 габанидул хъарахъги.

Араб соналъул 12 моц1ида жаниб районалъул жанисел ишазул отделалде бач1ун буго кинабниги 283 г1арза. Гьел г1арзабазул 27 материалалда хурхун судалъ такъсирчиясе тамих1 гьабуна. 71 материал судалдаса нахъ ч1вана, 25 делоялда хурхун административияб тамих1алде ц1ана.

Араб соналъ гъалмагъир гьабун районалъул жанисел ишазул отделалде вачана 45 чи.

Полициялъул аслияб масъала буго халкъалъул х1инкъи гьеч1олъи, гьезул мурадал ц1уни. Нижер щулияб къасд буго хадубккунги гьеб нухдасан ине, кьурич1ого законалги, рит1ухълъиги ц1унизе. Г1акъуба-къварилъи бугезе кумекалъе т1оцере рекерулеллъун рук1ине. Г1адамазулгун бухьенги щула гьабун, гьезул кумекалде мугъч1вайги гьабун, цадахъаб х1алт1удалъун бажарула такъсирчилъи дагь гьабизе.   

М. Мух1амадов, РОВДялъул начальникасул ишал т1уралев, полициялъул подполковник.