 19 соналъ цебе, ай 1992 соналъул декабрь моц1алда Россиялъул
Президентасул Указалда рекъон г1уц1ана Федералияб казначействоялъул бет1ераб
Управление.
Дагъистан Республикаялъул казначействоялъул система
х1алт1изе лъугьана 1996 соналдаса нахъе. Нилъер районалдайин абуни 1996
соналъул июнь моц1алда г1уц1ана казначействоялъул отделение. Байбихьуда гьенив
х1алт1улев вук1ана 5 х1алт1ухъан. Жакъа къоялда отделениялда х1алт1улел руго
техникиял х1алт1ухъаби малъич1ого 12 х1алт1ухъан. Гьединго отделение ц1унулев вуго
11 чи. Гьел киналго х1алт1ухъаби руго т1адег1анаб лъай бугел, профессионалияб
рахъалъ х1адурарал, казначействоялъул х1алт1и бокьулел ва рукъалде рач1инч1ого
гьелъие заман кьолел.
Байбихьуда казначействоялъул отделениялъ хъулухъ гьабулаан
цох1о Федералияб бюджеталдаса г1арац щолел клиентазе. Хадуб байбихьана
республикаялъул ва районалъул бюджетал щолезе хъулухъ гьабизе. Жакъа къоялда
районалда бугеб казначействоялъул отделениялъ хъулухъ гьабула 9 федералияб
бюджеталдаса г1арац щолезе, 10 республикаялъул, 56 бак1алъул клиентазе.
Исана соналъул ич1го моц1алда жаниб отделениялъ къабул
гьабуна 4566 расходалъул заявкаби ва 596 наличнияб г1арцул ва бак1алъул
бюджеталда хурхун районалъул финансовияб управлениялъул к1инусгоялдаса ц1ик1к1ун
реестрал.
Отделениялъ х1алт1и г1уц1ун бук1ана №131 Федералияб закон
«Об основных принципах организации местного самоуправления в РФ» рекъон, ай
гьелда рекъон къабул гьабураб бюджеталда рекъон. Нижее х1алт1и бигьалъана
районалъул ва бак1азул администрацияз жиндир заманалда бюджетал къабул гьариялъ
ва отделениялде заманалда щвеялъ. Гьелъие квербакъи гьабуна районалъул
администрациялъ ва финансовияб управлениялъ. Нижер бухьен бук1уна гьезулгун ва
дагьаб цебег1ан районалъул администрациялъул заседаниялде босун хал гьабуна
районалъул бюджет т1убаялъул х1акъалъулъ суал. Гьеб гуребги районалъул
финансазул управлениягун цадахъ т1орит1ула семинар-совещаниял росабазул бут1рул
ва бет1ерал бухгалтералги г1ахьаллъун.
Лъик1аб бухьен бук1уна районазда гьоркьосеб налоговияб
инспекциялъулгунги жиндир заманалда налогал щвеялда хурхун. Гьелъул х1асилалда
лъик1лъана лъабабго бюджетазде налогал рач1ин. 9 моц1алъул налогал рач1иналъул
планалги т1урана.
Нижерго х1алт1ул бицани, г1езег1анго хиса-баси лъугьана
казначействоялъул отделениялда ц1ияб соналдаса байбихьун отделенияги къан
гьабулеб буго Управлениялъул отделлъун. Дагь гьабулеб буго х1алт1ухъабазул
къадар. Рук1арал лицевой счетал къан, ц1иял рагьулел руго, ай отделениялда
гьелда хурхун х1алт1абиги ц1ик1к1ун руго.
Казначействоялъул х1алт1ул к1варги бич1ч1ун г1езег1ан кумек
щола регионалъул администрациялъул рахъалдасанги.
Районалъул казначействоялъул х1алт1и г1уц1иялъулъ к1удияб
бак1 ккола республикаялда бугеб Федералияб казначействоялъул Управлениялъ ва
гьелъул нухмалъулез отделение хьезабун буго къвариг1арабщинаб сурсатаздалъун,
къо бахъанаг1ан лъик1лъулеб буго материалияб база, х1алт1ул шарт1ал.
Гьелде т1адеги Федералияб казначействоялъул Управлениялъул
нухмалъулев Мух1амадов Сайгидх1усейн Ах1мадовичасул кумекалдалъун районалъул
отделениялъе щвана районалда лъилниги гьеч1еб г1адаб ц1ияб мина, кинаб суалалъ
аск1ове аниги т1убач1еб суалги хут1ич1о ва нилъер районалде гьесул лъик1аб
бербалагьиги буго.
Россиялъул казначейство г1уц1аралдаса 19 сон т1убаялде
рач1унаго отделениялъул коллективалъул ва дирго рахъалдасан баркизе бокьун буго
киналниги нижер клиентазда, г1адлу ц1униялъул, финансовиял г1уц1абазда ва нижгун
х1алт1улезда гьеб праздник, гьаризе киназего чорхое сахлъи, парахалъи ва
х1алт1улъ бергьенлъаби.
| 
