Кидагог1адин исанаги нилъер районалда эбелалъул къо к1одо гьабун т1орит1ана тадбирал. Гьездасан цояблъун бук1ана 24 ноябралда Хунзахъ Ш. Шамхаловасул ц1аралда бугеб культураялъул рукъоб т1обит1араб дандеруссинги. Гьелда г1ахьаллъи гьабуна райадминистрациялъул вакилзабаз ва районалъул мустах1икъал улбуз.
Руччабазда эбелалъул къоги баркун, коч1олаб сайгъаталдалъун тадбир рагьана ва лъуг1изег1ан берцинго гьеб нухда бачана Дагъистан республикаялъул мустах1икъай артистка Г1айшат Тажудиновалъ. Байрам баркун к1алъазе рахъаразда гьоркьор рук1ана районалъул бет1ерасул заместителал Шамил Г1аммаев ва Асадг1али Г1абдуразакъов, лъай кьеялъул отделалъул начальник Залимхан Г1умаров ва цогидалги. Гьез жидерго к1алъаязда к1вар буссинабуна инсанасул г1умруялда эбелалъ кколеб къадруяб бак1алде ва г1ун бач1унеб г1ел ах1ана улбузул адаб-х1урмат гьабизе. Ахбердиева Умужатица бицана эменги нахъа гьеч1ого лъимал г1езарулаго жиндирго эбелалда бихьараб г1акъуба-г1азабалъул. Киналго ах1ана руччабазул къимат гьабизе. Данделъи берцин гьабун бук1ана культураялъул рукъалъул х1аракатчаг1аз ах1улел куч1дузги. Умумузул бак1иде рахъиналъул сценка бихьизабуна Хунзахъ т1оцебесеб ясли-ахалъул гьит1ичаз. Культураялъул х1алт1ухъабаздалъун х1аракаталдалъун т1аде рач1аразе х1адурун рук1ана квен-т1ехалъул бечедал тепсиялги. Ахиралда киналго т1аде ах1арал улбузе кьуна гьит1иналго сайгъаталги. Тадбир ана рохелгун аваданлъи жубараб ах1вал-х1алалда. Тадбир дагьабги берцинлъилаан гьелъул г1ахьалчаг1азул свери дагьабги г1ат1идаб бук1арабани, жеги гьединал дандеруссиназда г1ахьаллъич1ел руччабиги ах1ун гьабун бук1арабани. Районалда дагьал гьеч1елъул жидер умумул рагъда хут1арал, лъимал г1емерал, г1адатиял, гьединал тадбиразде ах1изе мустах1икъал улбул. Лъик1аб бук1инаан хадубккун гьединал к1очон теч1они.
И. Мух1амадов.
|
