Умумузул лъик1ал г1адатал, гьезул г1умру-яшав хадусеб г1елалъухъе кьей, гьелдаса гьез пайда боси ккола нилъер мурад. Гьеб масъала цо къадаралъ т1аде ккола культураялъул г1уц1абаздеги. Нижер Сивухъ росдал культураялъул рукъалъги гьабулеб буго гьелда хурхараб х1алт1и.

Гьале дагьал церег1ан къоязги т1обит1ана нижеца «Дир росу, дир ч1ух1и» абураб ц1аралда гъоркь умумузул г1адатазул бицунеб тадбир. Росдал гъоркьияб авалалда буго «Этнодом» абураб гьалбадерил рукъ. Гьениб халичаби, т1анса-салмагал ригъун, росдал к1одо гьабураб сурат, рагъул ва зах1маталъул ветераназул х1акъалъулъ, колхозияб г1уц1арухъанлъи бихьизабулел стендал къват1ир ч1ван берцинаб г1уц1а-к1ут1и гьабун бук1ана авалалъего. Сверухълъиялдаго т1ибит1ун бук1ана громкоговорителалдасан рик1к1унеб росдат1е гьабураб кеч1:

Ассаламу г1алайкум,

Росдал жамаг1ат-

Жигарал г1олилал,

Г1анч1ал кьерилал,

Нусилъе бахинч1еб

Харабазул т1ел,

Т1аде г1олел ругел

Г1исинал лъимал…

Кват1ич1ого т1аде щвана гьалбалги. Районалъул бет1ер Саг1ид Юсуповгун рук1ана гьесул заместителал, райадминистрациялъул аппараталъул х1алт1ухъаби, культураялъулгун, лъай кьеялъул отделазул нухмалъулел, росабазул бегавулзаби. Гьалбадерида чед-ц1амалдалъун, сахъадерил ч1аг1дадалъун дандч1вайги гьабун тадбир нухда бачана библиотекаялъул заведующая Х1айдарова Загьраца.

Кинавго чиясда гьимун к1алъалел,

Гьоболасе нуц1а рагьухъе толел.

Рак1ал аваданал, инсан хириял

Халкъ бижараб росу, сахъадерил ракь.

Муг1рузул ц1умаца т1авап гьабулеб

Т1олго халкъ бач1унеб курортги гьаниб,

Кинабго т1абиг1ат, т1олго берцинлъи

Т1адег1анас кьураб росуги гьаниб.

Сверухълъиялдаго рихьулел рук1ана бецараб харил бижагъал, бакъваралъул ч1ах1иял г1архъал. Доле магъилъа ч1ах1ил магьги ц1ун яч1уней Халисат, харил х1амагун рокъове унев Асадулагь, маг1ардаса бищараб ракул гьегьги баччун юссуней Загьидат. Мучари бет1улел цоял, щар ч1валел цогиял, бак1-бак1алдасан лъел ц1езе къулг1адухъе рач1унел хъах1маккал г1адал ясал-г1адатияб маг1арул росулъ бук1унеб ч1аголъи. Пуланав Мух1амадил къаси бук1ине бугеб бертадул х1акъалъулъ ясазул бицен гьоркьоб къот1изабула риччалел рук1арал чуялъ Х1абибил чу бергьун бугилан бач1араб цоги рохелалъ. Умумулъанго батараб буго Сивухъ чуял риччай, бергьаралда гвермендаби рухьин, чот1ахъанасда гор балеб. Иццухъ рук1арал ясалги гьенире г1едег1ана жидерго гвермендабигун. Цоги нек1сияб махщел, яс росасе кьелалде гьелъие давагьаби, буртаби лъолел, буртинадул т1агърал, хьитал гьарулел. Аби буго Х1оцоса Нажмудиние Фатаг1али ханасул яс Пат1имат кьолелъул гьелъие сайгъаталъе кьун бук1анила сахъадерил буртина-арбабашан. Квас самун, къач1ан буртина лъолеб къаг1ида бихьизабуна к1удабаз г1олилазда гьеб къоялъ. Гьенибго бицана сахъадерил к1алзул гьунарчаг1азулги. Ах1ана ва рик1к1ана нек1сиялги гьанжеселги шаг1иразул куч1дулги. Гьелдаса хадуб киналго руссана бечедаб кванил ниг1матазул столалде нахъе.

Гьоло ч1вараб г1ат1ги бог1олч1аг1аги

Сивухъг1ан камилаб киб эб бук1араб.

Гьоц1ог1адаб т1иги т1охол лазатги

Т1олазго беццулеб гьаб нижер росдал.

Гьениб гьабураб жидирго к1алъаялда Саг1ид Камиловичас баркала кьуна умумузул г1умру-яшав цебеч1езабурал сахъадерил культураялъул х1аракатчаг1азе. Балагьизе бокьарал щвана гьалбадерил рокъоре, гьениб лъай-хъвай гьабуна умумузул цебесеб рук1а-рахъиналъулгун. Гьанибго абила, гьаб риидалил моц1аз 80-100 г1аги гьобол вач1анин нижер гьанивеянги. Т1адег1анав гьоболасе гьабулеб адаб-х1урматалда къабулги гьавун т1овит1ана гьаниб бихьаралъ к1удияб асар гьабурав, киналдасаго рази-ракилъун арав рик1к1адаб Бразилиялдаса гьоболги.

Ахиралдаги, баркала кьезе бокьун буго заман батун нижер тадбиралда г1ахьалъарав районалъул бет1ерасе, гьесда цадахъ рук1аразе, нижерго бегавул Мух1амадие, гьаб тадбир т1обит1изе квербакъаразе ва кумекалъе ратаразеги.

• Сайгидх1осенова, культураялъул рукъалъул директор.