Гьал г1агарал къоязда цоги рохалилаб хабар бач1ана нилъер районалде. 2015 соналъ районалъул социалиябгун экономикияб рахъ цебет1езабиялъе г1оло Россиялъул Муниципалияб академиялъул президент Александр Шапошниковас «Россиялъул бищун лъик1ав муниципалияв х1алт1ухъан» абураб меседил г1аламат каранда бана нилъер районалъул муниципалияб г1уц1иялъул бет1ер Юсупов Саг1ид Камиловичасда. Гьединго бак1алъулаб муниципалияб г1уц1и цебет1езабиялъулъ лъураб к1удияб бут1аялъухъ къиматал сайгъатаздалъун ва медалаздалъун к1одо гьаруна районалъул бет1ерасул заместитель Шамил Г1аммаев ва информациялъул отделалъул начальник Шамил Мух1умаев.
Районалъул зах1матчаг1аз, Хунзахъ муниципалияб г1уц1иялъул бет1ер Саг1ид Камиловичасда ва гьесул кумекчаг1азда рак1-рак1алъ баркулел руго гьезие щварал шапакъатал. Хадубккунги районалъул ц1ар борхизабиялъе тавпикъги икъбалги нужее.
|