14 декабралъ Хунзахъ т1обит1ана «Районазул халкъияб информациялъул алатаздаса пайда босиялъулъ Интернеталъул к1вар» абураб темаялда муг1рузул районазул СМИязул редакторзабазул семинар. Семинаралъул аслияб мурадлъун бук1ана редакторзабазул профессионалияб х1аракатчилъи борхизаби, районка ц1алдолез Интернеталдасанги ц1ик1к1ун пайда босулеблъун лъугьинаби ва гьел халкъалда гьоркьоб т1ибит1изабиялъе ц1и-ц1иял нухал рати. Маг1арулазул редакторзабазе семинар т1обит1изе вач1ун вук1ана республикаялъул бет1ерасул г1акълучи Азнаур Аджиев.
Улкаялъул информациялъул бет1ераб агентство-ИТАР-ТАССалъул х1аракаталдалъун т1обит1улеб гьеб к1вар бугеб ц1ик1к1араб мажлисалда г1ахьаллъанаТАССалъул бет1ерав редакторасул заместитель Александр Куприянов, «Люди Peopole» компаниялъул управляющий Владимир Змеющенко, «Моя округа РФ» проекталъул нухмалъулев Антон Долгов. «Гьанжесеб информациялъулаб жамг1ияталда газеталъул к1вар», «Печаталда кьабг1араб газеталъул ва Интернеталъул сеталда сайталъул бат1алъи» абураб темаялда лекция ц1алана Владимир Змеющенкоца. Семинаралъул г1ахьалчаг1и рак1рагьараб гара-ч1вариялде, ишалъулаб бах1салде рачараб, гьезул суалазе жавабал кьураб к1алъай бук1ана Александр Куприяновасул ва Антон Долговасул.
Г1ахьаллъаразе г1езег1ан пайдаяб бук1ана семинаралъул тема, гьеб ана киназулго ч1агояб г1ахьаллъигун ва пайдаяб ах1вал-х1алалда.
| 
