Жакъа нилъер обществалъе х1ажат вуго кинабго рахъалъ цевет1урав, рух1ияб рахъалъ бечедав, физическияб рахъалъ сахав инсан куцазе. Гьединав инсан куцазе ккани, педагогасда лъазе ккола щибаб лъимадул г1амал-хасият, гьесул бажари ва гьунар. Гьелъие г1оло школалъул щибаб классалда хадур рухьинарун рук1уна классалъул нухмалъулел. Гьел жавабияллъун ккола классалда ц1алулгун тарбия кьеялъул х1алт1и гьабизе. Классалъул нухмалъулел лъугьине ккола классалда гьабулеб щибаб х1алт1иялде гьоркьоре. Гьел жалго рук1ине ккола лъималазе мисаллъун. Гьез жигар бахъизе ккола г1адамазде рокьи бугев, зах1маталде рокьи бугев, Ват1аналде, вижараб ракьалде, ц1алулеб школалде рокьи бугев ва гьездаса ч1ух1улев, т1абиг1аталде рокьи бугев, сахаб г1умруялде рокьи бугев инсан куцазе.
Гьал къоязда районалъул культураялъул к1алг1аялда т1обит1ана г1аммаб гьоркьохъеб лъай кьеялъул школазда классалъул нухмалъулесул статус, къадру-къимат борхизабиялъул, гьезул тарбиягун лъай кьеялъул рахъи буголъи ц1ик1к1инабиялъул мурадалда «Самый классный, классный» абураб конкурс.
Гьелда г1ахьаллъана г1емерисел школаздаса классазул нухмалъулел.
Конкурс т1обит1ана ч1ах1иял ва байбихьул классазда гьоркьоб бат1а-бат1аго чанго номинациялдеги бикьун.
Т1оцебесеб, «Дун ва дир класс» абураб номинациялда конкурсантаз видеофрагментазул кумекалдалъун бихьизабуна жидецаго нухмалъи гьабулеб классалъул ц1алдохъабазда гьоркьоб гьабулеб х1алт1и. Гьелда гьоркьобе бачун бук1ана классалда гьарулел гара-ч1вариял, классалъул саг1тал, умумузул собраниял, лекциял классалда гьарулел экскурсиял, походал, интересал г1адамазулгун т1орит1улел дандч1ваял, заралиял пишабазде рокьукълъи бижизаби, музеялде, выставкабазде хьвади ва гь.ц. Гьеб х1алт1ухъ хал гьабулелъул жюриялъ х1исабалде босана тема кин рагьун бугебали, материал къват1ибе кьезе лъай, муг1алимасулги ц1алдохъабазулги гьоркьорлъаби.
К1иабилеб, «Щай дун х1алт1улей йигей классалъул нухмалъулейлъун» абураб творческияб презентациялда педагогаз бицана гьеб х1алт1иялде жидерго бугеб рокьиялъул. Щияй классалъул нухмалъулелъ цоялдаса цоялъ берцинго бицунеб бук1ана х1алт1и т1адег1анаб даражаялда иналъе жидерго гьабулеб х1алт1ул. Г1ажаибго берцинго ва мух1канго гьелъул х1акъалъулъ бицана Уздалросдал гьоркьохъеб школалъул учительница Саида Давудмух1амадовнаялъ. Школа гьеб кколин к1удияб пачалихъ,- ян абуна гьелъ, лъимал, гьениб г1умру гьабун ругел г1адамал. Пачалихъалъул бет1ерас (директорас) буюрухъ кьун бугила лъик1 ц1ализе, кинабго бицунелде рокьи бижизабизе, дарсазда щвараб лъай г1умруялда х1алт1изабизе. Гьеб гьабизе ккани, педагогасда лъазе кколила ц1алдохъабазулгун гьоркьоблъи батизе, гьелдаго цадахъ педагогасул адаб рехун теч1ого, к1удиясул адаб гьабун, гьит1иналгун х1ерен рук1ун церехун ине. Гьединаб ах1вал-х1алалда жий лъималазда цее яхъунила артистка х1исабалдаги, тохтурлъунги, скульпторлъунги, г1ажаибал лъалк1ал ралагьулейлъунги, юкъарухъанлъунги, хъвадарухъанлъунги. Гьеб киналъулго х1асилалда, жинда к1олила, т1олабго лъайги, къуватги, жигар-жанги, рокьиги лъималазе кьолей, т1ад буссун гьезги жиндехун божилъиги, рак1 рагьиги, бищунго аслияб рокьиги кьолей талих1ай ч1ужуг1аданлъун йик1ине.
Лъабабилеб номинациялда классалъул нухмалъулез бихьизабуна 4-5 ц1алул соналъе жидецаго х1адур гьабураб программа, классалъул цадахъаб х1алт1ул план, цере лъурал масъалаби гвангъун рихьизаризе махщел, ахиралда ккезе ругел х1асилал, классалъул нухмалъулесул жиндиего хасиятал педагогикиял къаг1идаби.
Гьенибги жюриялъ х1исабалде росана тема г1ураб къаг1идаялда рагьун бугищали, аудиториягун х1алт1изе лъай, педагогикияб культура, артистмах1лъи, эркенго к1алъазе бажари ва гьеб гуреб цогидабги.
Жюриялда рук1ана щибаб соналъ т1орит1улел муг1алимзабазул конкурсалъе къимат кьун ругьунал, лъай ва махщел ц1ик1к1арал лъай кьеялъул отделалъул информациялъулгин методикияб централъул педагогал. Ахиралда гьез гьарурал рит1ухъал х1асилазул кьуч1алда, т1оцебесеб бак1 ккуна ч1ах1иял классазул муг1алимзабазда гьоркьоб Х1усенова Саида Давудмух1амадовнаялъ, Уздалросдал гьоркьохъеб школа, байбихьул классазул муг1алимзабазда гьоркьоб Шамилова Пат1имат Х1амзатовнаялъ, Гьоц1алъ гьоркьохъеб школа.
К1иабилеб бак1 кьуна ч1ах1иял классазул муг1алимзабазда гьоркьоб Г1алибегов Х1ажимурад Гъазиевичасе, Хунзахъ № 2 гьоркьохъеб школа, байбихьул классазда гьоркьоб Гереева Мадина Мух1амадовнаялъе, Уздалросдал гьоркьохъеб школа.
Лъабабилеб бак1алде рач1ана ч1ах1иял классазул муг1алимзабазда гьоркьоб Г1амирова Рапиг1ат Муртазаг1алиевна, байбихьул классазда гьоркьоб Ниматулаева Пат1имат Макъсудовна.
Киналго конкурсалда г1ахьаллъаразе ва гьелда бергьенлъи босаразе кьуна дандрекъон кколел рак1алде щвеялъе сайгъатал, сертификатал ва реццалъул грамотаби.
Конкурсалда бергьенлъи босарал муг1алимзаби ине руго республикаялда т1обит1улеб гьебго конкурсалда г1ахьаллъи гьабизе. Нижер мурад буго гьениса нилъер муг1алимзаби бергьенлъиги босун т1ад руссун рач1ин. Саг1ат лъик1аб батаги, Нужее, классазул нухмалъулел.
|