Гьал г1агарал къоязда нилъер районалъул искусствалъул школа мустах1икълъана Дагъистан республикаялъул ц1алулгун методикияб централъ лъазабураб декоративиябгун прикладнияб искусствалъул конкурсалда т1оцебесеб бак1алъе ва т1оцебесеб даражаялъул дипломалъе. Гьеб т1адег1анаб къиматалъе школа мустах1икълъана «Ихдалил фантазия» конкурс-выставкаялда дунялалъул халкъазул ясик1аби рихьизарулелъул бихьизабураб профессионалияб бербалагьиялъухъ ва жидеего хасиятаб къаг1идаялда ургъун гьабураб мурадалде буссараб х1алт1иялъухъ.
Конкурс-выставкаялда профессионалияб къаг1идаялъ ц1алдохъаби х1адур гьариялъухъ, х1алт1удехун буссараб творческияб бербалагьиялъухъ ва республикаялда художественнияб лъай цебет1езабиялъулъ лъураб к1удияб бут1аялъе г1оло школалъул преподавателал Г1абдулх1амидова Заира Мутаг1иловнаялъе, Х1ажиева Асма Мух1амадовнаялъе, Саг1адуева Эльмира Дибировнаялъе ва Г1алиева Пат1имат Г1абдулаевнаялъе щун руго т1оцебесеб даражаялъул грамотаби.
Баркула муг1алимазда гьезие щварал бергьенлъаби. Кидаго кисаго рак1алда ругел мурадал т1уран, рак1 бохун руссаги нуж сапаралдаса.
Дица гара-ч1вари гьабурал г1олохъанал преподавателал: Заираца, Асмаца, Эльмираца гьадин бицана жидерго профессиялъул ва конкурсалъул х1акъалъулъ:
-Нижеца, лъабалъго лъуг1изабуна Дагъистаналъул пачалихъияб педагогикияб университеталъул художественниябгун графикияб факультет. Х1алт1изе лъугьараб т1оцебесеб къоялдасанго байбихьун, жигар бахъана нижеда цере ц1алулел лъималазул искусствалде рокьи бижизабизе, гьел церет1езаризе, гьезул фантазия бач1инабизе.
Лъималазул сунде рокьи бугебали хал гьабун, гьел ругьун гьарула релъабазул, карандашазул кумекалдалъун суратал рахъизе, угьине, хьухьине, бисераз букъизе, т1угьдул гьаризе, ххамил, т1абиг1иял материалазул экспонатал. Гьединал материалазул кумекалдалъун х1адур гьарурал рук1ана нижеца выставкаялде росун рук1арал дунялалъул халкъазул ясик1абазул экспонаталги.
Ниж щибаб соналда уна нижер положениялда рекъон т1орит1улел республикаялъул конкурсазде ва щибаб нухалда цересел бак1ал росич1ого т1адги руссунаро.
Цебехун рехсараб конкурс ана г1уц1араб къаг1идаялда, щибго х1арам, рек1к1 гьабич1ого рихьизаруна церехъабиги.
Н. Г1алиева.
| 
