Гьал къоязда рохалилаб хабар бач1ана нилъер районалде Россиялъул тахшагьар Москваялда т1обит1араб Т1олгороссиялъулаб лъайкьеялъул «Бук1инеселъул школа» щуабилеб форумалда жигараб г1ахьаллъиги гьабун, нилъер районалъул Т1ануси ва Бакьагьеч1и росабазул г1аммал гьоркьохъел школазул директорзаби: Дибиров Хъайитмаз ва Х1амзатова Пат1имат жиде-жидер номинациязда мустах1икъаб бергьенлъиги босун т1ад руссун рач1ун рук1иналъул х1акъалъулъ.
Россиялъул гьанжесеб лъайкьеялъул масъалаби камил гьариялъул ва церет1езариялъул суалазде гьоркьобе ц1алул процессал унелъул ц1и-ц1иял лъик1аздаса лъик1ал технологиял рачине ккеялъул х1акъалъулъ номинациялда бихьулеб бут1аги лъун, Т1ануси г1аммаб гьоркьохъеб школа бахъун буго «Бук1инеселъул школа» конкурсалъул лауреатлъун.
«Ват1ан бокьиялъулаб тарбиялда цебехъан» абураб номинациялда «Россиялъул бищунго лъик1аб 100 школа» бут1аялда бихьулеб х1алт1иги гьабун Бакьагьеч1и г1аммаб гьоркьохъеб школа ккун буго нусго лъик1ал гьоркьохъел школазде гьоркьобе.
К1иялго лъайкьеялъул школазул нухмалъулезе щун руго дипломал ва медалал.
Россиялъул аза-азар школазда гьоркьохъеб гьединал конкурсазда г1ахьаллъи, гьезда гьоркьоб мустах1икъаб бут1а лъей ва гьезие бук1ине кколеб къимат кьей, нилъер районалъул школазе к1удияб бергьенлъилъун ккола. Бокьун буго к1иябго школалъул педагогазда баркизе гьезие щварал бергьенлъаби ва гьаризе хадубккунги районалда лъай кьей цебет1езабиялъулъ ч1ах1иял бергьенлъаби. Киназулго рак1алда ругел мурадал т1урайги, гьабулебщиналъе тавфикъ кьеги.
| 
