Понедельник, 10.12.2018, 07:49 | RSS | Приветствую Вас Гость
Главная | Регистрация | Вход
Меню
Последние номера

7 Декабрь 2018г.№90-91(10122-10123)

30 Ноябрь 2018г.№88-89(10120-10121)

23 Ноябрь 2018г.№86-87(10118-10119)

16 Ноябрь 2018г.№84-85(10116-10117)

9 Ноябрь 2018г.№82-83(10114-10115)

Газета - это лицо района
Мы в социальных сетях
Instagram Facebook
Видео
З.О.Ж. ХУНЗАХСКИХ АКСАКАЛОВ. Спартакиада среди Хунзахцев Супербабушка Сакинат из Хунзаха Лотерея газеты СЕЛЬСКИЙ ТРУЖЕНИК . Открытие камня памяти Хаджи Мурату Культура и традиции Хунзахский р-он «Белые журавли»ЦАДА 2010г. Cвадебный обряд c.Сиух посмертно наградили Орденом «Мужест Участник ВОВ Мух1амад-расул. Праздник Белых журавлей Цада 2009г. Док. фильм о Хунзахском районе. Праздник в ХУНЗАХЕ 9 май 2011 год. Патахов Курбанали с.Сиух 2012г.Вече Махмуд Абдулхаликов Народный артист ВИА САРИР 1994г.Хунзахский район Хундерил музей тарихалъул нугI Юбилей Хунзаха 1989 год (2400 лет) Непавший Герой - Хаджи Мурат Документальный фильм.Хунзахский рай 70 -летие Хунзахского района. Хунзахский музей. Белые журавли.К 90-летию Расула Гам Документальный фильм Хунзахский рай Презентационный ролик курортно-тури РАСУЛ ГАМЗАТОВ-ФИЛЬМ О ПОЭТЕ. ФОРУМ МОЛОДЕЖИ ХУНЗАХСКОГО РАЙОНА 2 День молодежи в Хунзахском районе 2 УМУМУЗУЛ КУЧ1ДУЛ (Г1АЙШАТ ТАЖУДИНОВ Праздник Белые журавли (К 91 летию Закладки первого камня МАТЛАС. Фильм о Кайтмазе Аварском 100 летний юбилей Махулова в Хунзах Стихи Расула Гамзатова. День молодежи в с. Хунзах. 2015 год Вечер памяти наиба Хаджимурата в Ху Хунзахский район. Гьазул х1акъалъулъ бицуна Мала Алха Гьазул х1акъалъулъ бицуна-Магомед Ц Районалъул найихъабазул данделъи Гьазул хIакъалъулъ бицуна - Гимбато Инсан ва сахлъи Гьазул х1акъалъулъ бицуна - ХIайбул Улбузул хIурматалда... Эбелалъул къ День в музее.2017 год. Итоги 2013-2016г.г. МРХунзахский ра Тарихалъул тIанчал(Страницы истории (Открытие памятника Фазу Алиевой) г ГIажизал лъимал рохизаруна Гьазул хIакъалъулъ бицуна - Работни МагIарул гIадатал ракIалде щвей Хунзахский каньон АВАРСКИЙ КОНЦЕРТ(САРИР) с.ХУНЗАХ 19 Санал свераниги хвел гьечIеб байрам День учителя ЦIада поэзиялъул рукъ рагьана М.ХIайдарбеков кIодо гьавун гьабура ГIобода варкаут рагьи ХIабибил бергьенлъиги бекьечIдерил Мы в гостях Патахова Айшат
Выдающиеся личности района
Случайное фото
Водопад Тобот
Погода
Форма входа
Наша кнопка
Мы будем вам признательны, если вы разместите нашу кнопку у себя на сайте.

Хунзахская Газета, Сельский труженик, Росдал захIматчи


Статистика

Онлайн всего: 1
Гостей: 1
Пользователей: 0


Главная » 2018 » Декабрь » 1 » БАКЬАГЬЕЧ1ИСА ДАЦИ ГЬАВУРАЛДАСА 70 СОН Т1УБАЯЛДЕ.
13:06
БАКЬАГЬЕЧ1ИСА ДАЦИ ГЬАВУРАЛДАСА 70 СОН Т1УБАЯЛДЕ.

2018 соналъул 7 ноябралда 70 сон т1убалаан Бакьагьеч1иса машгьурав шаг1ир Х1усенов Мух1амад (Даци) гьавуралдаса. Гьев рак1алде щвеялъе чанго соназ живго жанив х1алт1арав «Росдал зах1матчи» газеталъги, бахъулеб буго гьесул творчествоялъул гьит1инабго бут1а.

Чахъабазе гуро т1ахьал хъвалел, г1ухьбузе хъвала

Бакьагьеч1иса Дацил бук1ана г1ажаибаб гьунар. Аллагьас (а.т.) инсанасе кьураб щибаб гьунаралъ бихьизабула жиндирго гьеб гьунаралъул заман. Чода т1икъва кьабизе махщел бугев чиясул заман бат1ияб буго, компьютеразда х1алт1изе лъалев чиясул заман бат1ияб буго. Гьунар ц1ик1к1ун бугог1ан гьесул ишалъулъги жиндирго заман ц1ик1к1ун бук1уна. Дида лъаларо нилъер заманалда Бакьагьеч1иса Дацица г1адин нилъер заман кагътида бихьизабурав чи. Хинк1аздасан ражидул мах1 г1адин гьулчун бач1унеб буго гьесул куч1дуздасан нилъер заман. Цох1о кеч1алъ бицуна нилъеда кинаб съезд т1обит1улеб мехалда гьеб хъварабалиги, гьеб лъугьа-бахъиналъе кколеб къиматги батула гьеб коч1олъ.

Аллагьас (а.т.) инсанасе кьурал гьунаразул цо бищунго лъик1абги щун буго Дацихъе. Нусго чи валагьун къот1носа уней к1одо г1одой ккани, ункъого чи велъула. Къогояв велъуларо. Бакьагьеч1иса Дацил кеч1 ц1алани дов къогоявги велъула, ункъогоясда бич1ч1изецин бич1ч1уларо щиб жо Дацица гьабун бугебали. Гьеб ккола махсароялъул даража. Г1адан велъизавизе зах1матаб жо гуро. Зах1матаб жо буго г1акълуги бугев лъайги бугев, литератураги бич1ч1улев чи велъизавизе. Чахъабазе гуро т1ахьал хъвалел, г1ухьбузе хъвала, г1ухьби кидаго чахъабаздаса дагьалги рук1уна. Дацие гьеб кинабго кьун буго г1умруялъ: т1ахьаз, телевизоралъ, нуц1ида нахъа лъураб ц1илц1ица, Москваялда т1орит1улел съездаз.

Гьеб кинабго бат1ияб къаг1идаялъги бихьун, бихьараб мехалда гьелъ жиндиего гьабураб асар бат1иясе кьезе к1веялдайин нилъеца гьунарилан абулеб.

Гъазимух1амад Гъалбац1овас Бакьагьеч1иса Дацил «Мой х1укумат» абураб т1ехьалъе хъвараб цебераг1иялдаса.

 

Щиб жо кколеб маг1арул газета

Гьуддибиров Салих1ил

Ц1едех1-туманк1 сабаблъун,

Ц1ан вахъун вук1ун вуго

Хъулхъидаса Шамилов.

 

Гьеб нахъег1анаб х1алт1и

Х1ехьезе к1веч1ого ав

Ун раг1ула г1арзалъе

«Баг1араб байрахъалде».

 

Редактор Шамхаловас

Щибго х1ал лъазе теч1о,

Шамиловасе ц1акъаб

Гакълуги кьун вит1ана.

 

Г1емер заман иналде

Ав х1алт1уде восана,

Восстановитги гьавун

Гьанжелъаг1ан х1алт1ана.

 

Гьедиг1анго х1ал к1олеб

Г1акълу щиб бук1арабан,

Рак1алде щвезабуна

Шамиловасда дица.

 

Цо раг1и хисич1ого

Г1умаханида аск1об,

Эс бицараб жо буго

Дицаги гьаниб хъвалеб.

 

К1удияв залимасул

Зар гьеч1ого к1ал ч1валеб,

Бах1арчияб жо буго

Жибго гьит1ин газета.

 

Пакъир-мискинчиясул

Чорхол рух1 щулалъулеб,

Щайт1абигун къеркьолеб

Къуват буго газета.

 

Кьабуни-унтуларев,

Ах1ани-раг1уларев,

Х1амаг1адав чиясе

Г1адлу буго газета.

 

Духъа сурав босулев

Судья гуро газета,

Дуе х1укму къот1улев

Х1аким гуро газета.

 

Х1ал дагьав чи къвак1изе

Къадру буго газета,

Къварилъарав воххизе

Хит1аб буго газета.

 

Дуца маг1у бац1ц1унеб

Квербац1 гуро газета,

Киназдаго баулей

Баба гуро газета.

 

Бихьинчияс ккараб къо

Къуркьич1ого борхула,

Къадруялде чи кколеб

Калам буго газета!

 

Нилъерго районалда

Бугеб ах1вал-х1ал лъалеб,

Х1укуматги бихьулеб

Бихьин буго газета.

 

Газета ц1аларасда

Ц1ияб жо г1емер лъала,

Районалда кколелъул

Кинабго цебе ч1ола.

 

Жиндирго напс т1ок1авчи

Чанги гьелъ нахъе цула,

Рак1 бац1ц1адав х1алт1ухъан

Веццун к1одо гьавула.

 

Радио х1алт1улареб,

Телефон буц1ц1ун ч1араб,

Газетаги гьеч1они

Гьабилеб щиб нилъеца.

 

Нилъецаго нилъ ккуни

Кинабго лъик1 бук1уна,

К1варас к1вараб гьабунги

Хвезе тоге газета.

 

…Гьеб калима бицана

Шамиловас доб къоялъ,

Г1умруялъго къеркьана

Т1екълъиялде данде гьев.

Нагагьлъун, цо хут1араб

Нилъер газета хвани,

Хварал чаг1и нилъ ругин,

Вугоан ав бицунев.

Вореги маг1арулал,

Маг1аруллъи к1очонге,

Нилъерго байрахъ г1адаб,

Борхатго ккве газета!

 

ХАЛКЪИЯБ СОБРАНИЯЛДЕ ДЕПУТАТЛЪИЯЛДЕ КАНДИДАТ ОГЬОГЬОЕВ ЛАБАЗАН КЪИНК1ИКЪВАНК1ОВИЧАСУЛ РИЩИЯЛЪУЛ ПРОГРАММА

Гьадаб кьуру нису анищ,

Огь, Лабазан, къинк1и – къванк1,

Кьили-мег1ер мохмох анищ,

Огь, Лабазан, къинк1и – къванк1,

Гьадаб хьонлъи хьалбал анищ

Огь, Лабазан, къинк1и – къванк1,

Хьонда къанал панкъал анищ

Огь, Лабазан, къинк1и – къванк1.

(Халкъияб кечI]

 

Дица бищун цебе баркала кьола

Дун гьаб кандидатлъун лъурал чаг1азе:

Дир г1агарлъиялъе, росу - ракьалъе,

Кьолболъ вугевщинав выборщикасе.

 

Нагагь дун вищани, щивав вацасе

Шагьаралда лъик1аб секция щвела.

Депутат вахъани, вацг1алзабазе

Цо-цоясе цо-цо машина кьела.

 

Кьолболъ г1олел ругел г1олохъабазе

Хъулухъ балагьила бигьаяб г1адаб.

Г1агарал - божарал ясал - чаг1азе

Россал ралагьила рес бугел г1адал.

 

Гьениса рилъарал, росдал къват1ахъе

Хъирулги х1арщулги растворал т1ела,

Т1аде наккуги бан, михир бачунел

Машинаби росун роххада лъела.

 

Лъел ц1олеб къулг1адухъ, къват1ул харбазе,

Хассаб мина бала, микрофонги лъун.

Росдал годик1аниб, кагътал х1алезе,

Казино рагьила, буфетги бугеб.

 

Бекьеч1дерил магъилъ, гъогъол хурзабахъ

Бекьун, ганч1ил т1орччол бахча гьабила,

Гьениса бач1араб бац1адаб т1орччол

Боц1уе кваназе корма гьабила.

 

К1иго яги ц1ик1к1ун ц1око-т1ехь кьолеб

Ц1ияб г1иял тайпа г1езе гьабила,

Г1одосан, цо кило квасул къунц1улеб

Керчаб баг1аргьоло бекьизе буго!

 

Кандидатаз пурал гьураз х1алт1улел,

Гьабал разе руго росу раг1алда.

Г1урул ханаздасан хинк1ал гьарулеб,

Гьит1инаб цо завод Заг1иб бук1ина!

 

Ц1олбокь раг1алалда ралъдал портги бан,

Гьолокьан Генуре гуми лъедела,

Гьонодисез кьуни, Кьили маг1арда

Мохмохал къот1улеб къасаб - рукъ бала!

 

Къородиса кьот1а, ражи гьабизе,

Заводал г1уц1ила, г1урул лълъималъул.

Лъаг1илухъа т1аде маххул нухги лъун,

Макьаст1а берцинаб вокзал гьабила!

 

Буц1улдерил рохьоб, хьопол гъут1бузул,

Гъудазул фабрика гьабизе буго,

Гьениб г1агардаго, г1аркьел - жоялъул

Жулал гьарулеб цех рагьизе буго!

 

Моч1охъ х1орил бакьулъ, буругъалги лъун,

Нартил рог1рал лъела Г1арахъмаг1арде,

Г1еч1ендерил рохьоб бензинги бахъун,

Хъашт1ан, балат1асан бит1ила К1ахъе!

 

Мах1ачхъалаялъул полощадалда,

Ч1алг1аде теч1огo, г1иял къай лъела,

Г1алаг1артаялде ТУ-ялги роржун,

Турциялде ине эркенлъи кьела!

 

Къохьол т1ок1лъи лъалел т1анусдерица,

Т1аса рищун хъубчул рукъизе руго,

Росдалго сси ц1унун, сахъадерица

Хьитазул фабрика рагьизе буго!

 

Хьимакъоро г1ери, Г1ахьалч1и гьобо,

Г1ураб рател буго ток кьезе нилъер.

Байикьдерил колхоз, кулдерил фермер,

Кванил х1инкъи гьеч1о гьанже нилъее!

 

Гьанщадерил курак экспорт гьабуни,

Эзде т1аде балеб долларазул ц1ад.

Ахидуни г1ураб г1еч бичанани,

Бихьи бати ккани, ккезе бугеб жо!

 

Дун гьадин гаргазе гьоболчи гуро,

Нужеда гъорлъ г1урав росдал чи вуго.

Шагьарал хирияв ханыга гуро,

Хунзахъ бокьун буго город гьабизе.

 

Гьаб дир т1адебоси т1убач1они, дун

Т1ок1ав депутатлъун тоге нужеца!

Жив-живасе къот1ун къисмат кьеч1они,

Къват1иве реххизе разияв вуго!

 

Дидасаги гучал чаг1и ругелъул

Чанги жо абила эзни нужеда,

Амма гьабсаг1аталъ г1арац дихъ гьеч1о,

Гьезг1адин чакарги газги бикьизе!

 

Бокьухъе вище дун! Щай дие г1умру

Анищал гьарулев, ресги гьеч1ого!

Гьанже дунг1адазул замана щванин,

Щивас, цо г1адинан, кье дие гьаракь!!!

Вассаламу КЪИНК1И – КЪВАНК1!!!

 

Просмотров: 59 | Добавил: NiGMaT | Рейтинг: 0.0/0

by NiGMaT © 2018 ВНИМАНИЕ!!! ПРИ КОПИРОВАНИИ МАТЕРИАЛОВ САЙТА, ОБЯЗАТЕЛЬНА АКТИВНАЯ ССЫЛКА НА ИСТОЧНИК!!!
Хостинг от uCoz