Т1олабго улкаялда, 15 февралалда Афгъанистаналъул рагъул г1ахьалчаг1азул къоялъул х1урматалда т1орит1ула рагъухъаби - интернационалистазулгун дандч1ваял. Гьедин, нилъер районалъул Гьамущи росулъги к1одо гьавуна Афгъанистаналъул рагъул г1ахьалчи – интернационалист Г1абдулмажидов Расул.
Рохалилаб данделъиялде рак1арун рук1ана росдал школалъул, культураялъул рукъалъул, библиотекаялъул, жамаг1аталъул вакилзаби.
Культураялъул к1алг1аялде жаниве лъугьун вач1унев Расулида кеч1-бакъаналдалъун кьурдилаго дандч1вай гьабуна районалъул искусствалъул школалъул Гьамущи бугеб филиалалъул «Амущинка» кьурдул ансамблялъ.
Гьале байбихьудаса бахъараб ахиралде щвезег1ан дандч1вай бачарай ва гьеб г1уц1адго иналъе жигарчилъи гьабурай, ансамблялъул нухмалъулей Пат1имат Султ1ановалъ иргадал рахъинарун раг1и кьуна Мущули росдал бет1ер Ах1мад Ибнух1ажаровасе, Гьамущи росдал бет1ер Камилбег Мух1амадкамиловичасе, школалъул военрук Мух1у Сулеймановасе, организатор Пат1имат Мух1амадовалъе, росдал клубалъул директор Мух1амадханова Халипатие, библиотекаялъул заведующая Ибрагьимова Сарижатие. Гьез рак1-рак1алъ баркана Расул Г1абдулмажидовасда рагъухъан-интернационалистасул къо. Баркала загьир гьабуна кор боркьараб рагъда щибго х1инкъи-къай лъач1ого рагъарал г1олохъабазе.
К1алъазе вахъарав Расулицаги г1ун бач1унеб г1елалъе бицана рагъул кьог1лъиялъул, гьелъ гьарурал камиязул, нилъер г1олохъабаз гьениб бихьизабураб бах1арчилъиялъул, къо х1ехьеялъул. К1удияб ч1аголъиялда Расулие суалал кьун, гьеб рагъул х1акъалъулъ мух1канал баянал лъазарулел рук1ана 9-10-11 классазда ц1алулел васазги.
Балагьаразул рак1ал рохизарун рук1ана школалъул художественнияб х1аракатчилъиялъул г1ахьалчаг1азул церерахъиназги.
Афгъанистаналъул рагъалде, гьенир рагъулел рук1арал рагъухъабазде гьарурал куч1дул ах1ун, кьурдаби гьарун сух1мат-кепалъул сордоялде буссинабуна гьез гьеб сордо. Гьесие г1арцулаб сайгъат кьуна росдал администрациялъ, рак1алде щвеялъул сайгъатал кьуна росдал культураялъул ва библиотекаялъул рахъалдасанги.
Ахиралда к1алъазе вахъарав Расулица дандч1вай т1обит1аразе, жив к1одо гьавун сайгъатал кьуразе, ихтилат-кеп гьабуразе рак1-рак1алъулаб баркалаги кьун, гьара-рахьи, дуг1а гьабуна дунялалда рекъел щулалъагиян, рагъ-кьалалдаса ц1унун хут1игиян, рак1алда гьеч1ел балагьал т1аде рач1унгегиян.
|