Гьал къоязда «Россия-Исламияб дунял» абураб стратегиялъулаб къукъаялъ Каспийск шагьаралда т1обит1араб данделъиялда Хунзахъа Раджабов Х1ажимурадие гьес бахъараб «Г1адан ва божи» абураб документалияб фильмалъухъ, гьеб г1уц1иялъул председатель, Татарстаналъул президент Рустам Миннихановас кьуна диплом.

Санайил къукъаялъ т1обит1улеб данделъиялда Россиялъул бат1и-бат1иял миллатазул ва диназул халкъазда гьоркьоблъи щула гьабиялъулъ ва Ислам цебет1езе гьабулеб х1алт1улъ лъураб бут1аялъухъ кьола гьединаб премия.

Х1ажимурад Раджабовасул документалияб фильмалъул мурад буго г1ун бач1унеб г1елалъе рух1иябгун моралияб ва Ват1ан бокьиялде ах1улеб тарбия кьей ва халкъазда гьоркьосеб рекъел ц1уни.

Нижецаги т1олалго районцоязул рахъалдасан баркула Х1ажимурадида гьесие щвараб шапакъат, гьарула щулияб сахлъи ва жеги ч1ах1иял бергьенлъаби!

Автор.Н.Г1алиева.Ноябрь 2018 сон.

Гьал къоязда гьавураб къо к1одо гьабуна Гьоц1алъ гьоркьохъеб школалъул директор Г1абдурах1манов Г1абдурах1ман Мух1амадовичас.1976 соналда Дагъистаналъул педагогикияб институталъул ингилис мац1алъул факультетги лъуг1изабун вач1ана Г1абдурах1ман Мух1амадович г1агараб районалде х1алт1изе. Жиндицаго т1аса бищараб махщалиде бугеб рокьиялъги, х1алт1изе бугеб гъираялъги, т1оцебесеб къоялдасанго к1вах1-свак тун х1алт1ана Г1абдурах1ман. Гьес т1олабго жиндирго жан-жигарги, лъайги кьуна цере ц1алулел ц1алдохъабазул лъайги тарбияги борхизабиялъе. 12 соналъ бокьулеб х1алт1уда х1алт1улаго, Г1абдурах1манил свак лъалареб зах1матги, бажариги бихьун районалъул лъай кьеялъул управлениялъ гьев т1амуна школалъул директорлъун. Гьелдаса нахъе ана 30 сон. Гьеб заманалда жаниб къойидаса-къойиде т1егьан ва берцинлъун бач1ана школа, лъик1лъана гьелъул ц1алулгун тарбия кьеялъул х1алт1и. Гьавураб къоги баркун Г1абдурах1манихъе щварал нижедаги гьесдаги гьоркьоб ккана гьадинаб гара-ч1вари.