Аза-азар чиясул рек1елъ к1очонареб лъалк1ги тун тарихалде ана Советиял аскараз Афгъанистаналда гьабураб интернационналияб рагъ. Ичго соналъгун цо моц1гун бащадалъ халат бахъараб рагъулъ г1ахьаллъарал 600 азаргог1анасел Советиял рагъухъабазда гьоркьов вук1ана лъабазарго  дагъистаниявги. Гьезда гьоркьоса 140 ракьцояс г1умру кьуна Афгъанистаналъул халкъалъул эркенлъи ц1унулаго.

Гьеб рагъулъ бищун хирияб г1умру кьуна нилъер ракьцояв Т1анусиса Г1алиханов Шамилицаги. Х1ажатго гьеч1ел камиялгун, чанги эбелалъул рак1 судигун халатбахъараб гьеб тунка-г1уси къот1изе таралдаса 27 сон сверана.  Амма киданиги к1оченаро гьениб нилъер г1олохъабаз бихьизабураб бах1арчилъиги, къох1ехьейги. Гьезул багьадурлъиги, бихьинчилъиги, бах1арчилъиги Ват1аналде рокьи куцаялъул мисаллъун  хут1ила хадусел г1елазе.

Лъик1аб г1адаталде сверун буго нилъер районалда Афгъанистаналъул рагъухъаби – интернационналисталги рак1алде щвезарун февраль моц1алъул  бакьулълъиялда гьезулгун дандч1ваял т1орит1и. Исанаги к1удияб рохалилаб ах1вал-х1алалда.  16 февралалда районалъул культураялъул рокъоб т1обит1ана гьеб тадбир. Заманаялъул  зах1малъиялъ бет1ербахъиялъе бак1-бак1азде ун, унта - щокълун кодоре щвеч1о гьеб къоялъ г1емерисел интернационналистал. Гьезулгун  дандч1ваялде рач1ун рук1ана районалъул нухмалъулел, интеллигенция, культураялъул х1алт1ухъаби ва г1адатиял зах1матчаг1и.

Данделъиги рагьун рагъухъабаздехун баркиялъулаб к1алъай  гьабуна культураялъул х1алт1ухъан Пат1имат Султ1ановалъ. К1алъазе рахъарал муниципалияб  районалъул  бет1ерасул заместителал Г1аммаев Шамилица ва  Г1абдуразакъов Асадг1алица г1одорч1аразда жидерго ва данделъиялде вач1ине щвеч1ев районалъул бет1ер Юсупов Саг1ид Камиловичасул рахъалдасан рак1-рак1алъ баркана Афгъанистаналдаса СССРалъул яргъилал къуватал нахъе рачараб къо – 15 февраль. Гьарана киналниги Афгъанистаналда хъулухъ гьабурал рагъул г1ахьалчаг1азе чорхое щулияб сахлъи, роххел, аваданлъи ва нилъеда киданиги рагъул кьог1лъиги, кьалул сасги ч1вагегийилан т1адеги жубана. К1алъаялъул ахиралда гьез Хунзахъ муниципалияб г1уц1иялъул бет1ерасул ц1аралдасан киналниги рагъул г1ахьалчаг1азе рак1алде щвеялъул сайгъаталги  гьаруна.

Хадув  к1алъазе вахъарав рагъул ва Зах1маталъул ветераназул Советалъул председатель Г1алих1ажиев  Г1абдулат1ипица бицана араб г1асруялъул 80-абилел соназда, киноялда гурони рагъ бихьич1ел г1олохъабилъун рук1арал, амма къисматалъ чияр улкаялде рехун кьварарал рагъазулъ лъадарарал гьезул гьунарги къох1ехьейги жакъасеб г1елалъе мисаллъун хут1изе бугилан.

К1алъазе раг1и босарал  районалъул рагъул комиссар Шапиев Багьавудиница, районалъул нухмалъулесул кумекчи Мух1амад Мух1амадовас ва районалъул культураялъул отделалъул нухмалъулелъул заместитель Мах1ач Х1асановас ва цогидазги бицана жакъа нилъеца рагъухъаби – интернационналистазда баркулеб байрам  кколила, гьанир  г1ахьаллъарал рагъухъабазда г1емераб  г1акъуба – къварилъи бихьун щвараб бергьенлъи ва байрамилан. Нилъеда киназдаго бихьулеб бугила жакъа нилъер  пачалихъалда бугеб ах1вал-х1ал, гьал Афгъанистаналъул халкъалъул эркенлъи ц1унулаго рагъарал г1олохъабазе, нилъеца киназго  бажарараб кумек-квербакъи гьабизе кколилан.

Афгъанистаналда хъулухъ гьабуразул ц1аралдасан к1алъазе раг1и босарав Гьит1инов Мух1амадица баркала кьуна районалъул нухмалъулезе ва культураялъул х1алт1ухъабазе жидее г1уц1араб бечедаб столазухъ ва кеч1-макъаналъухъ. Ургъел бикьана ц1а боркьараб коронире жал рехараб Ват1аналъ бесдал  лъимал г1адин тун рук1иналъул. Щибаб  санайил раг1и кьолила жидер масъалаби т1уразе. Амма т1асияб сон бач1инег1ан т1ок1ал жал рак1алдего щоларилан. К1алъаялъул ахиралда гьес пикру буссинабуна, жакъа ругел афгъанцазул мурадал бицунел теч1ого, т1ураялъе жидедаса бач1араб кумек-квербакъи районалъул ва Р

республикаялъул нухмалъулезда щвеялда хьул бугин жидеран.

Дандеруссин ана берцинго, ихтилат-кепалда.

У. Къурамух1амадова.